為了實現媽媽遺願，我成為了女兒國唐僧: 774

呢隻妹真係難服侍…唉，雖然公仔麪唔係啲乜體面嘅食物，但都重起碼有味道揀嘅，方便容易煮又唔會難食，所以我永遠都會買到成個架都係五顏六色；如果朝早煮就食雪菜味，餸燒臘食就用雞蓉味，落雲吞就用雲吞味，每次QQ都係用雲吞王包湯，我就用味精粉…話時話雲吞味公仔麪已經好難買得到，唔通死人公仔又偷偷地cut味？就好似已經好耐都無見過嘅牛肉味咁，雖然可以買貴幾毫子嘅一丁…但明明同一間廠出，點解要我買貴啲嗰隻喎。
八點幾，我啱啱開餐，隻Q亦都返到嚟。
我：「個鑊重有呀，自己去夾啦。」
Q：「哦，咁你去夾啦。」佢坐低直接搶走我嗰碟。
我：「搞乜呀，食緊㗎，好想食我口水尾咩？」
Q：「唔係，係因為喺底嗰啲會比較油。」
佢又講得幾有道理，我都唔知點駁佢好，但明明我就已經炒咗兩三年公仔麪，喺爐火純青嘅技術下又點會炒燶或者整到成鑊油。算！就由得妳食我口水尾，等妳要遲早聽我話。
我：「你…無嘢要同我講呀？」
Q：「嗯…唔該晒你嘅炒麪，都幾好食。」
我：「唔係呀，我係指今日場波…」




Q：「你次次做運動都一仆一轆，無眼睇你呀。」
做乜咁話我，妳明明…就好擔心我會整親。
我：「邊係呢，我呢啲叫技術性插水，如果唔係邊度會換到個罰球返嚟呢？」
Q：「你同我講都無用，我都唔識睇波嘅，最緊要你無事就得啦。」
我：「都唔係㗎，好彩佢踢落嚟嗰下我一路縮，如果唔係會好痛㗎。」
Q：「哼，痛又有乜所謂，大把女仔呵返你。」
我：「係咪妳會呵返我先？」
Q：「你就想，做乜要我呵你，你慢慢痛啦。」
呢個女神真係夠晒一時時，都唔知佢想點。
我：「係嘅，妳去又唔係睇我踢，睇都睇啲師兄同瘟神入波先啦。」




Q：「邊個話我要睇佢哋踢波？」
我：「咁…唔通，妳係去睇Bubble打氣同指揮？」
Q：「咪傻啦，你估我係你咩…首先瘟神想我去睇同支持下社際活動，咁在公在私我都無理由推佢嘅，然後，我同啲社幹事都熟，既然我得閒點解唔去呢，擦下存在感都要嘅，最後就係佢哋幾隻嘢都去，我就更加無理由唔去，至於你哋踢成點我有乜所謂，不過最好就贏啦。」
呢個女神現實起上嚟呢…抵佢俾瘟神放棄。
我：「咁，辛苦晒妳嚟支持活動。」
Q：「雖然我唔係鍾意睇波，但見住你喺度跑來跑去都幾開心嘅。」
我：「呀…點解咁講呀，我有乜特別。」
唔好笑我一仆一轆就得，球證都判對面犯規…