為了實現媽媽遺願，我成為了女兒國唐僧: 765

佢一聽完就露出個貓眼樣出嚟，好似想對我施暴咁，不過呢個係我哋兩個人喺屋企時嘅情趣。
W：「阿爽，你還好嘛？」估唔到Wendy都落埋嚟。
唔通佢哋想爭仔？忽然之間我變得飄飄然，以為自己男神上身；不過QQ係女神嚟點會同人爭仔，呢啲情況之下只會為我帶嚟麻煩。
我：「有我哋班兩個靚女關心我，點敢有事喎。」
Q：「食屎啦！」佢一嘢拍落我上臂，然後走咗去…
W：「你朋友佢…無嘢吖嘛？」
我：「有無聽過金玉其外，敗絮其中，啲港女得個樣靚，其實係黑心鬼嚟。」
W：「重喺度講笑…睇嚟你哋真係好friend，使唔使，我扶你返看台上面坐呀。」
我：「唔使啦，咁樣唔好意思，我自己行就得。」
身為一個熱血方剛嘅死細路，就算得返一隻腳都可以彈上樓梯啦！雖然係有少少痛嘅…




到而家先有時間關心下自己啲同學，由於阿健屈服喺社長嘅淫威之下，佢係同自己啲隊友一齊坐；而四位女神就梗係糖黐豆咁啦，所以…無可奈何地，阿康就唯有同Wendy坐埋一齊，話晒都係同班同學吖嘛，雖然唔熟。
唔知佢哋有無講啲乜呢？頭先我喺個場度邊有時間關心佢哋喎，睇怕都係講我壞話多。
結果我上返嚟之後就坐咗喺佢哋嘅中間，由於佢哋無乜共通性，我都係唯有講下波嘅八卦，話佢哋知兩個中五前鋒喺度爭波射，又唔想聽瘟神枝笛咁樣，有個中四校隊就唔肯踢後翼結果要做後備。
康：「踢場波都要諗咁多嘢，你哋真係…不過，呢啲搶風頭嘅活動，永遠都係少數人嘅專利嚟。」
我：「無計啦，如果叫到啲女同學嚟睇自己入波，又真係好型仔嘅，其實呀，想搶風頭嘅人又唔係好多嘅啫，有啲人都係想單純參與下，我諗是但報下名普通人都有機會落場。」
康：「唔知，你會唔會有機會入到波呢？」
我：「睇下一場囉…咁我…係自由防守嚟，理論上可以變成自由突擊，但可能會俾瘟神鬧死，睇情況啦，我都係嚟幫下腳，無諗住要入波出風頭。」
W：「嘻嘻，如果你入到波，我都可以讚你型仔嘅。」見佢笑到甜絲絲咁，我都有啲驚。
結果，我哋隊最後keep住三比一。
然後到綠社對黃社，黃社係最水皮嘅一隊，係得個龍門似返啲樣，全場都諗住死守咁滯，上半場已經落後緊一比零；阿健佢下半場先有得落場，表現就…中規中矩吧，踢得再好都唔關我事，而且唔似得我咁有女嚟睇，所以…算吧啦。




臨完場前綠社再入多粒，總數二比零，阿健都有份助攻，我諗Bubble師姐佢應該暫時鬆咗口氣，總共兩關叫過咗一關，但下場對我哋就未必咁輕鬆，以瘟神性格都唔會放佢一馬。