為了實現媽媽遺願，我成為了女兒國唐僧: 763

健：「喂！細龜…使唔使反轉晒啲卷呀？好秘密嘅咩？」就算佢未反轉，都從來睇唔到第一版。
龜：「無嘢呀，呢啲…無乜好比較。」
健：「鬼得閒比較，你成績唔係差吖，咁怕醜做乜…係呢，有無興趣一齊食lunch呀？」
龜：「唔喇，我放學搭車返屋企。」
健：「你鍾意啦，我執埋啲嘢走先。」
我：「係呢，Wendy妳頭先想講乜呀？」
W：「無呀，我話…晏啲喺球場見啦，我會嚟同你打氣。」
嗯，多謝…但見到妳個樣，總會令我產生一啲微妙嘅壓力，因為實在唔太知妳想點。雖然，我同妳嘅交集可能只係剩返最後呢幾日。
然而，我最想交集消失嘅係Yvonne女大魔頭…嚴格嚟講，佢係一個靚女，玩變態嘢我都唔太抗拒，但佢一定會為我帶嚟麻煩，萬一令到我同QQ產生誤會都唔知點算好…
就係咁，我哋食咗一個好平常嘅lunch，然後我返屋企休息，再換衫去踢波。而QQ，應該有各種校務同交際，估計佢會喺學校直接過去。




三點未夠就去到球場，個太陽重係曬到阿媽都唔認得，不過無所謂啦，我從來就唔係一個陰間嘅小朋友，所以就同我嘅敵人傻仔健練住盤球先。過咗陣四社嘅球員都已經嚟齊晒，重有啲觀眾，有抱住返工mode嘅負責老師，重有少數嘅同學，唔好以為呢啲課外活動會有好多人嚟睇，基本上除非係強迫性，否則一般嚟講九成人都寧願快啲放學返屋企洗洗睡。
觀眾呢…有各社嘅幹事同活躍份子，有當係聯誼班聚嘅中五同學，低form嘅基本就無乜，因為都無乜人出賽，嚟得嘅都係有目標想嚟昅仔嘅妹妹仔，但我相信中三四大女神就唔係抱住呢個目啲嚟…另外重有我熟悉嘅阿康同Wendy…
唔廢話住，我係嚟踢波嘅，首先由四個社長猜包揼決定初賽配搭，真係十分兒戲，非常求祈，但咁樣先彰顯出青春嘅光輝；尤其係Bubble師姐每次一猜個心口都會震一震，呢個女人可能為咗想拉近同隊員嘅距離，明明佢無份落場都換咗套自己嘅運動衫；雖然無學校套PE衫咁淫，但都幾美觀同養眼嘅。
By the way…點解學校PE衫特別淫？可能我實在係睇得太多AV，真不該。
抽籤結果係第一場紅對藍，第二場綠對黃，即係話我今日唔會遇到阿健；然之後，紅藍兩社長繼續喺度不亦樂乎猜包剪揼決定開波先後次序，睇嚟只要一日重讀緊書就會對呢樣嘢樂此不疲，不如唔使踢波啦，猜夠廿一分決定輸贏最慳水慳力。
一輪兵戎相見之後，比數嚟到三比一！