為了實現媽媽遺願，我成為了女兒國唐僧: 752

我：「唔知喇，佢哋係咁，Yvonne咪又係換晒衫。」Yvonne換咗件oversized嘅薰衣草色T，加條黑色大髀褲，睇落潮潮地，同斯文嘅QQ形成一種反差，而Uranus就仍然著住校服，兩隻腳蹺住坐硬係介乎走光與唔走之間。
我：「至於韻婷…佢話就嚟放暑假唔捨得校園生活啫，無乜嘢嘅。」
健：「唔捨得校園生活定唔捨得你呀？」
我：「唔好亂講啦，一直以嚟佢當我朋友啫。」
踢到咁上下，距離交場嘅時間重有半個鐘。
瘟：「各位紅社嘅隊員，我有啲事要走先，你哋繼續畀心機練，玩得開心啲！」
我就諗住社長佢絕對唔會踢完波身水身汗同女神慶祝生日，原來佢一早已經準備好晒；睇住佢滿心歡喜瀟灑咁離開球場，我望一眼QQ佢用不置可否嘅眼神嚟回敬返我；而同一時間，Yvonne亦都發現咗我嘅視線而詭魅咁凝視住我…
剩返最後十幾分鐘，由另外嗰兩個社嚟埋齋。
我：「唔好意思呀，要妳一個人坐喺度無乜理過妳添。」佢嚟到嗰陣，我啱啱喺上面等緊波踢，同佢吹咗幾嘴之後就落咗場；之後我見佢望咗幾眼QQ，好似有啲想過去一齊坐，畢竟都叫做同班同學吖，但幾個女神坐埋一齊嘅力場實在係太大，普通人係插針都插唔到落去。
W：「唔緊要，橫掂都係想考完試輕鬆下，嚟睇你追住個波跑下都幾好。」


我：「我有乜好睇喎，嚟陪跑儲人頭踢下後衛，睇其他師兄好過啦。」
呢個時候啲人都開始散，QQ同Yvonne喺我哋面前經過，但就無打招呼，而Uranus就喺場側邊繼續同人social。
W：「你個好朋友都幾得意㗎喎。」
我：「唔使理佢…我哋嘅溝通係比較特別。」
W：「係囉，玩地下情嗰啲都無你哋咁cool。」
我：「妳就唔好笑我啦，邊玩得起喎。」
跟住落嚟同隊友一齊俾Bubble briefing完嘅某人都行咗埋嚟。
健：「差唔多夠鐘，係時候返去…」
我：「都係…咁…bye bye喇。」
平時呢啲時候，我哋當然會一齊返去，但而家我身邊有個女孩子喺度咯…按道理佢過嚟同我單聲係正常嘅，而按道理我哋三個都算尚且順路…不過呢個moment都已經尷尬，我更加唔想成程路都尷尬落去，對住Wendy我其實乜都無所謂，但如果令到阿健或者Wendy尷尬就變成我老尷。


健：「咁我走先…星期五再見。」
好多男仔都唔明，你越係細膽，越係要面子，就只會令到情況越嚟越尷尬；就好似上次細蚊咁，俾著我嘅話一定會同個女仔講多謝，然後捉住佢隻手放入自己條褲入面，咁就大家都好過啲。
W：「咁我哋都行咯。」
我：「好呀，我送妳返屋企囉。」
W：「乜嘢送喎，你都順路嘅，而且又唔會有goodbye kiss。」