為了實現媽媽遺願，我成為了女兒國唐僧: 743

陽一先生，無論我睇咗幾多本足球小將，始終都係解答唔到我心中一個重要嘅疑問，戴翅偉同早苗幾時第一次？而佢哋係咪都將自己第一次交畀對方？喺我有生之年好想知道答案，所以你都要做一個長命百歲嘅漫畫家，我會等到你幫佢哋兩個畫H愛情外傳…
我搖一搖個頭，Wendy又邊有早苗咁活潑，而我就更加只係一個落場玩下嘅後衛。
而且，嗰日我都會食飯㗎嘛，點會餓住去踢波…
我：「應該都會返嘅，橫掂下晝要去比賽…如果我返到嚟，去廚房睇下妳喺唔喺度囉。」
Wendy係一個好女仔嚟，以屋邨妹嚟講，樣同細蚊打和啦，心口至少大佢兩個cup，而且重乖好多；如果QQ喺我身邊消失，我會即刻追佢。
到底…我又喺度諗緊乜？
W：「到時我會喺廚房等你，希望你唔好令我失望。」呢句嘢，令我感到非常大嘅壓力，傳聞暑假前啲學生哥同埋學生妹會諗得特別多嘢，而佢又會唔會對我有所表示呢…另一邊廂瘟神對QQ嘅攻勢又係令人煩惱，雖然其實唔到我煩。
呢個moment，我應該專心眼前嘅書本，唉。
返到屋企，唔諗咁多，繼續溫書先。
我：「歡迎回家，妳終於都返到嚟…」




時間已經差唔多十點，睇嚟溫得好開心。
Q：「做乜啫，都唔係好夜咋嘛。」
我：「食咗啲乜好嘢呀？夠飽飽未？」
Q：「食咗牛角，一個和牛十品set再加多個普通焼肉set，飽死咗喇。」
我：「睇嚟妳又打劫完人哋咁喎。」
Q：「嗱，我無講過任何嘢呀，係佢決定去邊度食，就連菜都係佢點嘅，而且重點係佢畀得起。」
我：「做女仔真係好，餐餐都有人請。」
Q：「唔好以為好好，唔使錢食飯其實好大壓力。」
我：「有乜壓力，諗住換男朋友嗱？」
其實聽佢講咁耐，感覺好似呢邊好伙食啲，但佢男朋友每月都要俾佢整四五餐，拉長嚟計又唔同講法，唔知瘟神荷包係咪真係深啲呢？




Q：「唔會啦…食完飯…同佢拖住手行咗陣啫。」
我：「嘩，該煨咯，竟然已經咁sweet sweet…」
死火，講完先醒覺自己開口夾著脷，因為QQ同我出街都成日拖手，即係反彈話返自己。
Q：「無嘅，唔係你諗咁樣，佢一直都好君子，咁我見佢對我都好好，咪禮貌性拖手行咗陣，費事要喺中間隔住條十cm嘅空隙啦…同埋考晒試嗰日佢都約咗我，去睇佢踢波同埋食夜晚…」
我：「睇嚟…佢諗住喺呢個暑假攻陷妳喎，再係咁落去妳遲早失守都似。」
Q：「失乜鬼吖，對住佢我無乜感覺。」
我：「係，妳肯定？如果有感覺嘅話會係點？」
Q：「呢樣嘢，你唔係要我開口同你講呀…如果你見到個靚女好有感覺你會點？」
會點呢？我望一望自己下半身…