為了實現媽媽遺願，我成為了女兒國唐僧: 700

明明，我應該係個唔多讀書，日日躝街得閒亂咁溝女唔負責任嘅死仔包，點解我而家咁鬼忙，又要溫書，又要照顧QQ，又要參加學校活動，又要對住Wendy唔知點好，重有細蚊…
然後到咗某日嘅星期五。
W：「今日放咗學一唔一齊溫書呀？」
我：「欸…今日唔得閒，放學有嘢搞。」
W：「有乜做呀，約咗地下普通女仔朋友？」
我都唔明佢講個咁嘅title係想點，不過我就照樣平常答佢，呃人嘅最高境界就係連自己都呃埋，只要自己唔尷尬，尷尬嘅就係人哋。
我：「唔係呀，今日社際足球去試下啲人腳咋。」
W：「係咪其他人都可以去睇㗎？」
我：「可以就可以嘅，都係學校卜嘅場，不過…第一日應該會好無聊，我怕嘥咗妳啲時間喎，不如妳留返嚟溫書啦，到時比賽實有得睇。」
W：「咁好啦，又唔急嘅…」




當然我覺得無聊係一個事實嚟，但我唔知QQ會唔會嚟，如果人少少得佢哋兩個嘅話都唔知點好，究竟一唔一齊坐呢？如果講嘢講乜好，講我壞話？就算唔關我事我都覺得尷尬呀；另外就係如果Wendy嚟睇，明顯係為咗我而嚟，其他人我唔理，又唔知死仔健會諗埋啲乜，主要係我唔想煩。
然後我趁有空檔就去搵我地下朋友。
我：「Queenie，放咗學妳會唔會去睇呀？」
Q：「我…唔會呀，唔係唔想嚟睇你，本身瘟神都有約我去，我覺得今日推咗佢先好似好啲啫，費事佢覺得我一約就出咁…主要都係我唔想煩住，同埋諗住今晚開直播，想返屋企瞓個晏覺，夜晚抖足精神開工。」
我同佢都算心靈相通，一齊唔想煩兒女私情。
我：「趁我唔喺度咪DIY埋先瞓晏覺，好瞓啲。」
Q：「唔使你理，就算你喺唔喺度我都識照顧自己。」
就係咁，我同阿健兩個放咗學就走去搵瘟神先。
我有問佢做乜唔搵Bubble，佢話橫掂都一樣。
瘟：「中五補緊課呀！我要留喺度捉人去，卜咗場四點到六點半，你哋去先啦，應該有人負責帶咗場紙去㗎喇！如果有其他人喺度就禮貌地請佢哋離開啦。」




你條友吖，求我去嗰陣就十足十哀契弟，到嚟問你advice嗰陣就求祈打發我哋走…
結果我哋兩條友換完PE衫就盲頭烏蠅咁行去球場，行到去就三點十左右，喺門口見到Bubble姐姐同埋另一個不知名嘅男幹事，跟班手持一個網入面有三個足球。