為了實現媽媽遺願，我成為了女兒國唐僧: 696

雖然普通朋友定義喺我嘅世界係包括…可以互相觸碰對方嘅身體，協助對方自我安慰，謦談性事…
康：「真係犀利，可以再見亦是朋友。」
我：「可能互相傷害過，而家都唔會嬲大家掛。」
康：「真係朋友咁簡單，有無超友誼關係呀？」
我：「無噃，你諗多咗…但唔保證將來一定無。」
康：「唓，又串嘴，最憎人炫富。」
我：「無啲咁嘅事，家陣大家一齊做毒撚。」
健：「我呸，重難聽過粗口。」知道我同女神共住嘅阿健，用不屑嘅眼神望住我…
然之後我哋三個又坐咗落快餐店嘅卡位。
我：「恩公，我要還返幾多錢畀你呀？」




健：「增咗一嚿八達窿，幫佢買咗少少嘢五十蚊，總共一百五十。」
我：「咁你啲車錢呢，加埋又幾多？」
健：「唔使喇，由得佢啦。」
我：「吓，由得佢？車錢船錢加埋唔平㗎喎。」
健：「我覺得，搭完程車同船都好似有啲得著，唔使你資助喇，自己出返感受好似深啲，同埋，我唔係嗰啲只要你出錢就會幫你做跑腿嘅傻仔囉。」
康：「嘩，你琴晚同細蚊兩個人搭船呀？」
健：「係呀，如果唔係點送佢返嚟。」
康：「好似幾開心喎，唔係優差嚟咩？」
健：「又唔係自己條女，定係你對飛機場情有獨鍾？咁有興趣如果再有機會我判畀你做。」
康：「哈，你認為我屋企會唔會咁夜放我出嚟吖嗱？我只係想講，夜鼆鼆同個女仔兩個人搭船，可以謦下欬咁都唔錯吖。」




健：「又唔係特別熟…可以謦啲乜？」
康：「就係唔熟，對佢又無興趣先講到嘢嘛，如果係同學反而怕，例如問下佢當年呢條友點溝佢，有無蝦佢，而家會點睇佢，八掛下都好。」
我：「做乜係要講到我係衰人咁…」
健：「無呀，我對佢哋兩個嘅嘢無乜興趣知。」
康：「咁又係，你寧願同Kuromi謦好過啦。」
Oops，四零四恐龍，something went wrong。
健：「唔好喺我面前再提呢個女仔，唔該晒。」
康：「做乜呀？食完檸檬衰咗嗱？」
健：「唔係…睇唔到有希望啫，網絡交友都係陷阱處處，阿康你唔好試喇。」
康：「做乜咁感觸，唔係俾變聲人妖呃吖嘛？」




健：「唔係，我寧願係咁，總之唔好再問。」