為了實現媽媽遺願，我成為了女兒國唐僧: 689

「啲喥啲喥…啲喥喥…」係阿爽打嚟。
見細蚊瞓著咗，我唔想嘈醒佢，於是就彈過兩個位先同佢講嘢。
我：「喂，乜事呀…」
叉：「我放工喇，細蚊佢無嘢吖嘛？」
我：「無嘢，不過重搭緊船，未返到嚟住。」
叉：「吓，乜搞咁耐㗎？重以為你哋返到屋企。」
我：「重好講，走船尾就係咁㗎啦，啲慢船成個鐘先搭完㗎，大概搭半前會到中環。」
叉：「原來…對唔住呀，今次真係麻煩晒你。」
我：「算啦，遊下車河…船河…都幾充實，夜晚個海都幾靚嘅…」
叉：「咁呀，下次我再同你一齊遊啦。」




我：「可以嘅，除非你帶多條女嚟畀我啦。」
叉：「講呢啲…咁…重有無地鐵搭呀？」
我：「啱啱check過重有，搭半多啲有一班。」
叉：「咁我去地鐵站接你哋啦。」
我：「有乜好接喎，我哋識返屋企。」
叉：「就算唔接你都要接佢嘛。」
我：「佢係你EX嚟啫，你唔係要快啲返屋企搵女神咩，放心啦，我唔會攪你條前菜。」
叉：「咁都係朋友嚟㗎嘛，閘機前等啦。」
呢條友…我都唔知點講佢好，明明同細蚊一齊緊嗰陣就唔嗲唔吊。
細蚊，係咪應該重鍾意佢呢？




如果我係細蚊…黐線，我喺度諗乜鬼。
※※※※※
我：「太好啦！終於返到嚟！健大佬英明神武，能幹超卓，細佬感激萬分！」我喺閘外同佢嚟過九十度鞠躬，高聲迎接主子，反正已經無晒人。
『嘟。』『嘟。』
健：「咪玩啦，我已經好眼瞓，交返佢畀你。」
蚊：「你真係要好好報答佢呀，麻煩咗佢咁耐。」
健：「得啦，咁我走先喇。」
我：「咪行住啦，你咁幫得手，我有手信畀你。」
健：「你黐乜…線，我喺長洲返嚟，你畀乜春手信我，你下次過長洲買返嚟畀我啦。」
我：「咪講廢話啦！上去七仔先！」




於是我唔理佢嘅反對，捉咗佢上地鐵出口間七仔，再喺百子櫃度A咗兩隻膠羹，打開膠袋。
我：「長洲手信都係芒果糯米糍啫，呢度有芒果布甸！」By the way我又唔明芒果同長洲有乜關係…
健：「係酒樓…今朝擺到而家嘅賣剩布甸呀？」
我：「你做乜一面嫌棄嘅樣！你知唔知道，某個女…麻煩女仔都好鍾意食㗎…」由於細蚊喺度，我唔想提太多女神怕刺激到佢。
健：「好喇好喇，我快啲食完快啲走啦。」
細蚊就無理佢，我一放低喺張high table佢已經自己打開潷嚟食。
我：「係呢，總共用咗幾多錢呀，我而家畀返你先啦。」我已經攞埋銀包出嚟。
健：「總共用咗…一百…五十…二百…」
細蚊就啜住隻膠羹喺度望住佢。