thriXt Qantasy 純文字安眠之作 (New: - U2K - 一直上架): 683

救命，佢喺度咁樣我唔止火燒心，直頭精盡人亡。
之後我喺露台繼續煮嘢，一邊享受住冷氣後面吹出嚟嘅熱風；唔緊要啦，QQ舒服就得，過一陣就可以入返去同佢一齊涼浸浸。
如果可以迫佢全裸就好，但點講得出口。
話咁快就開飯，今晚係食咖喱肉丁腸仔菜粒炒飯，啲白飯當然係由公司免費提供。
Q：「點呀，我個新頭像靚唔靚？」
係一張葵扇Q嘅啤牌框，但入面就換咗佢張相，個樣度加咗啲光眩暈嘅橫線令人睇唔清楚。
我：「嗯，非常好，好靚女。」
講真嗰句，無咗樣又點會靚吖，但唔出得樣又有乜辦法，啲毒撚都係睇波嘅啫。
Q：「呢張send畀阿健個傻仔好唔好？」
就係佢嘅背脊，加埋少少股溝。




我：「妳鍾意囉，但為乜要咁做？」
Q：「佢話我背多分，咪整張畀佢J下囉。」
我：「無端端做乜…妳諗住兵佢呀？」
Q：「無喎，佢睇落都無乜用，做乜要兵佢，只不過係我對人好啫。」咁妳對我又係點？
我：「哦…係嘞，妳唔使洗碗喇，準備直播先啦，啲碗留返我放工再搞啦，同埋，妳得個口罩同黑超，怕唔怕有人認得？」
Q：「怕呀！所以我買咗個鬼面具。」
我重以為係乜嘢鬼咁巴閉，點知唔係人中之龍入面真島背脊嘅般若惡鬼，而係小朋友撒豆驅鬼嗰隻兩角紅色傻kai kai鬼…
Q：「吼！嗚嘩！係咪好得人驚？」
我：「嗯…我去冰霜攞啲青豆出嚟掟妳。」
Q：「唔好呀！唔要青豆！」




其實成件事真係好唔夾，黑桃王后加赤鬼面具…不過算啦，啲毒男都係為咗睇佢啲肉。
睇住佢擘開雙手雙腳成隻蟹咁扮鬼行，實在係…太可愛，明明件衫同入面body就係小魔女。
玩完一陣佢就set埋部keyboard出嚟喺度練，而我就趴喺床上面諗住抖到九點三，然後就落去開工，點知到咗八點半左右有message入…
蚊：『阿爽得唔得閒，可唔可以救我？』
乜事呀？唔通想我教佢做功課？既然係send message嚟，應該都唔會係乜大件事。
我：『而家OK呀，妳即管講啦。』
蚊：『我被困長洲，可唔可以嚟接我？』
我：『吓，妳唔係俾人非法禁錮呀？』雖然按道理俾人禁錮重有乜可能用到電話…
蚊：『咁又無，我八達通負咗，又無晒錢…』
我：『點解會搞成咁嘅？跌銀包？打劫？』




蚊：『同個friend出去玩，佢無端端同我搭船去長洲，我都無準備，食餐飯又貴咗，所以咪咁。』
我：『咁妳唔叫佢負責返？』
蚊：『唔啦，你可唔可以嚟搵我呀？』
我：『個friend係男仔？』
蚊：『係，但唔friend喇。』