為了實現媽媽遺願，我成為了女兒國唐僧: 643

W：「不過你同女仔食飯都唔會有感覺㗎啦，成日有女仔黐住你。」
其實…我未至於成日有女黐囉，好唔好？只不過你哋知我以前同外校女仔拍過拖同埋俾妳撞到…
我：「咁又唔係嘅…點會呢。」
W：「我第一次同男仔單獨夜晚食飯㗎咋。」
我：「原來…係咁樣，都正常嘅。」
W：「其實第一次Lunch都係畀咗你。」
嘩…做乜講埋啲咁嘅嘢，好易誤會囉。
W：「好在你咁識同女仔相處，我完全無唔自在。」佢塊面紅紅地咁再加傻笑，都幾可愛。
我：「我…或者啦，我都唔知係咪優點嚟。」
與其話識相處，倒不如話我大膽唔要面，第一次隔衫揸落Carmen對波度，我俾佢屌到上天花板妳睇唔到啫；諗返起Carmen一開始可能都係為咗發洩，從來都無鍾意過我…但明明佢幫我包紮嗰時個樣都好緊張，我都唔知…




W：「我就完全唔識同男仔溝通，如果唔係你嘅話，我都唔知可以點開口約佢哋。」
嗯？唔通佢有其他目標？係就好，雖然我會傷心…
我：「女仔約男仔講一句就得啦，妳又唔差。」
W：「或者係嘅，但出到嚟可以點，完全唔知講乜好。」
我：「咁…都要睇夾唔夾嘅，個個都試過呢啲煩惱㗎啦，遲啲妳大個咗就唔覺係問題。」
我都懷疑過係咪因為QQ唔係處女先同我相處得咁好，難以想像一個出身富貴嘅乖乖女會隨便咁凸點同走光畀我睇重若無其事，我心目中呢type女神係要似Zilvia先正常。
W：「唉，點解你可以完全無呢啲煩惱，明明幾年前重係一個玩塗改液嘅低B仔，而家竟然可以令女神同你做朋友。」
我：「的確…學識同異性相處係好重要嘅，或者係…有個姐姐幫咗我掛。」
W：「邊個姐姐，係你以前嘅女朋友？」
我：「都可以咁講嘅…」嚟到而家我已經唔會吹有過幾多個女朋友，因為連自己都深度懷疑。




W：「你以前同佢係點㗎？」
我：「同佢…好難講妳知喎…無乜好嘢…」
W：「唔使怕喎，講少少嚟聽下，我不朽都知你曳㗎啦，又衰十一，唔好係度扮乖啦。」
我：「喂…喂喂，唔好咁大聲啦…」
W：「重有你最鍾意睇邊個AV女優？」
我：「宮島芽衣…乜妳識呢啲嘢嘅咩…」我滴汗了。
應承過唔會呃佢…雖然好似無關痛癢。
W：「梗係唔識啦！不過你哋啲男仔成日諗衰嘢，我諗有必要開始研究下。」
酒精…實在係累事，少少都唔得，如果唔係我佢應該俾第二條仔溶咗喇；我都唔知係仙地嗰少少酒精影響到佢面紅吖，定係因為講埋啲嘢太興奮所以塊面成個蘋果咁喇。