為了實現媽媽遺願，我成為了女兒國唐僧: 638

喺屋企，我同QQ一齊溫書；喺學校，我同韻婷一齊溫書。一個成績名列前茅，將我屌打到落地底，但我有乜唔明都可以問佢；一個同我半斤八兩，除咗數學之外我哋經常妳眼望我眼，一齊研究都搵唔到答案，然後我返去問QQ。一個隨住氣溫嘅飆升而越著越暴露，同我維持住奇怪嘅同居關係，身體接觸自然少不了，但由始至終佢可能只當我係玩具同工人；一個含羞答答含苞待放，似乎對我有啲意思但又無任何動靜，時不時會見到佢傻笑，衣著就輕鬆咗少少，每日都用兩蓻毛嚟話我知佢係一個純品嘅好學生。
大家唔好以為佢著背衫咁通街睇到，喺學校當然係著校裙啦，佢亦都唔會好粗魯咁舉起隻手搲頭；只不過，唔知點解我有啲強迫症，每日都會唔小心咁䚎到一次先覺得心安理得。
咁溫咗啲乜呢，唔講喇，我驚講得再多你哋啲小朋友就會嚇到走晒，陣間個爛作者怪罪起我上嚟就唔知點收科…唯一可以透露嘅就係同Wendy唔會溫reproduction，呢啲留返同QQ一齊溫；而我同QQ亦都越嚟越開放，唔係話我哋玩得越嚟越癲，而係有時會講下佢同條仔點樣做，有啲乜體位，前戲舒唔舒服；同佢謦呢啲真係好矛盾，一方面我對於佢嘅性觀念係非常好奇，但另一方面又無時無刻都諗起主角不是我。佢都有問我以前同Carmen，細蚊點玩，有時重會鬧我唔夠溫柔，亦都會八掛下我去邊搵AV同點樣揀。
同佢住埋一齊越嚟越舒服，已經唔記得咗獨居嘅日子；喺學校我又搵少咗健康佢兩個玩，佢哋當然眼紅有女陪我溫書，不過佢哋早就慣；至於以前街場啲波友，而家主要撞到面嘅地方就係酒樓，自從佢哋知我週末晚喺度返工就間唔中嚟滾攪下我，貪我可以幫佢哋refill任何甂（邊）爐料，又或者嗌啲多汁嘅小菜，例如沙嗲牛肉煲，跟手搵我落單嗌靚仔，即係白飯，一碗等於兩碗…
嘩！Mid term開始咗呀！
噢！Mid term完結埋！
係咁快㗎喇，因為mid term考四五日咋嘛；各位小朋友，可能你哋識我嗰陣重學緊side angle side，side side side，到你考完DSE我都未考完呀；而中朋友就可能學位畢業埋都未睇到我同QQ大；大朋友就可能今日苦惱緊點溝女同點畀人溝，結果到仔都生埋重喺度催緊爛作者稿。
最衰都係爛作者，搞到我大得咁慢；不過成世做細路都無乜唔好吖，無論大定細，我只係想同QQ…
通常呢，考完試都會係星期五嚟。
我：「Queenie…咁晏嘅？」成五點幾…




Q：「無呀，本身諗住同班八婆去買下文具咋嘛，所以咪無同你講囉，點知越睇越興奮，就睇埋啲精品同手工嘢，又行埋書屋，最後食埋甜品。」
女仔，永遠就同時喺一種好忙碌又空閒嘅狀態，問佢有乜做佢會答你無，但睇住佢喺屋企磨指甲都已經覺得佢一頭煙。
我：「係咁呀…嗯，想問下，如果妳今晚自己食飯應該無問題呀可？」