為了實現媽媽遺願，我成為了女兒國唐僧: 636

算，唔諗咁多，呢個唔係我風格。
於是我捧起埋隻碗，用筷子大啖大啖咁扒啲摻摻入口，又幾好味㗎喎，辣辣地得嚟又有椰香，味精都落得好足料，就係咁我清晒佢碗嘢，就連湯都只係剩返兩三啖喺底。
回想同QQ共用一枝飲筒飲可樂，嗰陣真係好興奮㗎，但係而家呢，我只係感受到食物嘅美味。
係因為QQ靚女所以咁？定係我對韻婷無感覺？
乜男仔會講感覺嘅咩？明明都係女仔嘅身體嚟…
W：「你都幾大食㗎喎。」佢飲住椰汁冰同我講。
我：「男仔都係咁㗎啦，我唔鍾意浪費食物。」
W：「平時一定大把女仔食唔晒塞畀你食。」
我：「邊係喎…呢啲，間唔中咁啦。」
W：「嗯，我信你同Queenie只係朋友，以後都唔會問你兩個嘅嘢令你難做，但關於其他嘅事情，我希望你唔好呃我，如果係當我朋友嘅話。」




我：「放心啦，我唔會…」我咬住龍眼答佢。
明明韻婷只係個平平無奇嘅屋邨妹嚟啫，點解我會感到壓力嘅，而且佢又講到咁凝重…但，只要一日維持現狀就唔會有問題嘅，繼續敵不動我不動。
如果佢想同我一齊就頭痛，試我係想試嘅，但QQ喺度會對我做成極大困擾，我亦唔想做負心漢。
食完飯就一齊行返學校，明明我哋已經謦掂數冰釋前嫌，但就各懷鬼胎…呀唔係…同床異夢…都唔係…總之心事重重無乜嘢講，個氣氛有少少尷尬…
返到課室一齊上堂，謦下功課，總算正常返。
然後放學準時返屋企溫mid term。
Q：「你哋…好似無事喇喎。」
我：「嗯，算係解釋返，佢無再嬲我。」
Q：「咁就好，佢係咪鍾意你呀？」
我：「無講到呀，但我諗就…多數都係嘅。」




Q：「難得有女仔冧你，唔考慮下？」
我：「咁呢層…又唔知大家啱唔啱，同佢都唔係熟咗好耐啫，或者認識深入啲先。」
Q：「感情嘅嘢，唔試過好難知嘅。」
出自QQ口就覺得特別諷刺，其實我同埋QQ嘅關係，我覺得最大問題並唔係佢有無男朋友，我就唔信佢兩個會咁容易白頭到老呀，加埋以QQ性格，我可以試下撬牆腳，唔排除佢會考慮一腳踏兩船；最重要嘅問題係，試完唔好咁點，有可能一齊住無問題，但拍拖就會好多詏撬，而且要繼續一齊住，面阻阻都唔知點分手；QQ佢讀書又叻，超級靚女，富家女出生，同我係兩個世界，我完全食唔住佢，佢唔會好似Carmen咁同我玩玩下咁拍拖，亦唔會好似細蚊咁由得我hea，到時發覺唔啱係隨時會火星撞地球。
唔一齊，我可以幾乎肯定佢對我有好感；一齊咗，衰咗嘅話，佢唔鍾意我就變咗事實；我承受唔到個後果，至少而家大家開開心心，無論如何我都唔忍心睇到佢難過，重要係為咗我呢條廢J。
我：「試完唔好點算？無謂浪費人哋青春啦…」
Q：「唔似你喎，又會認真到咁，明明你以前就係女都啱…我覺得，就係青春先要嘗試多啲，因為重有大把成本俾我哋犯錯，唔怕撞板。」