thriXt Qantasy 純文字安眠之作 (New: - U2K - 一直上架): 633

然後我就跟咗佢出課室，離開學校，向唔知邊度前行；咁一路上都會有啲其他同學望過嚟嘅，畢竟一男一女去食飯嘅組合唔會太多，除咗嗰啲街知巷聞嘅情侶檔之外…咁我又無乜嘢嘅，或者好多人都以為我花花公仔咁，反正我又無諗住溝學校啲女，我唯一嘅目標都係隔籬床個女仔。
我：「食呢度？」係一間星洲菜特色餐廳。
W：「係呀，你激嬲我，請我食飯好應該呀？」
我：「可以嘅，無問題…」
其實我都唔知自己何德何能去激嬲一個只係普通關係嘅女仔，睇嚟QQ嘅推測中咗八九成，韻婷係對我有啲嘢，只不過我唔知佢想點。
“Wendy，如果妳對我有意思，我可以畀妳㗎，絕對滿足到妳嘅身體，上床我隨時OK，都會惜妳㗎，不過唔好諗住有將來…”應該咁樣佢就唔會再鍾意我，但係我哋重要坐埋一齊幾個月。
星洲菜，其實都可以話只不過係一間整色整水貴少少嘅茶餐廳，餐牌一樣係午餐A至F，佢叫咗個海鮮叻沙摻摻，飲椰汁冰，六十幾蚊，我就係海南雞飯，飲龍眼冰，五十雞蚊；請佢食飯唔係大問題嘅，一餐半餐，貴少少都唔係問題嘅，由於我要照顧QQ同買餸，銀包平時都會有幾百以備不時之需；需然我係窮光蛋屋邨仔，但我袋住啲現金好多時都比一般同學多。
W：「我…唔會為咗嗰巴say sorry㗎，你…無論係乜嘢原因，都係呃咗我。」
我：「我又點會怪返妳轉頭呢…」
W：「咁你同埋Queenie到底係乜嘢關係？」




我：「關於呢點，我都唔知可以點解釋畀妳聽…」
W：「你唔會老套到話我知佢係你表妹嗰啲呀？」
我：「表妹…哈…唔係，其實我係佢屋企暗中派嚟保護佢嘅保鏢。」我重專登戳咗一下樣。
W：「唔係呀化？咁緊要，佢哋屋企得罪人？定係有壞人要綁架佢呀？」
我：「講笑咋，做乜咁認真啫，雖然我身形有啲似，亦都會保護身邊嘅女仔。」
W：「作死你呀！重喺度玩我，係咪想我整多巴畀你呀？咁你同佢…」
我：「咪好似我之前講嘅咁，係唔見得光嘅朋友咁囉，總之喺學校我哋會保持返一定距離。」
W：「吓，點解做朋友要做到咁？」
我：「咁佢係有錢女嚟，如果同我行得太埋會有啲怪㗎嘛，加埋我係男仔總會惹嚟閒言閒語，費事畀人話我係觀音兵啦。」
W：「咁你點解會同佢咁好朋友嘅？」