thriXt Qantasy 純文字安眠之作 (New: - U2K - 一直上架): 630

我：「邊有呃唔呃，我同妳一齊出現都唔代表乜啫，唔通我同妳喺學校要扮唔識，定扮鬧架？加埋我同佢其實無任何關係，點解佢可以嬲我同妳一齊出現喺呢度。」
Q：「夠喇，唔使再解釋，我已經清楚晒成件事嘅來龍去脈！」佢個樣成個女版柯南咁。
我：「唔好吊我癮啦，快啲講出嚟。」
Q：「今次我好肯定佢係暗戀緊你，正所謂山有木兮木有枝…」佢一副女詩人嘅樣子。
雖然係有啲扮嘢，但我都覺得佢幾李清照。
我：「山中有直樹，日久見人心我就識啫。」
Q：「好心妳就唔好亂噏啦！下一句就係心悅君兮君不知呀。」佢講還講，重用手指㧻落我心口…
我：「未聽過喎，重邊有現代人講啲咁嘅嘢。」
Q：「乜無呀，就連網絡小說都有啦。」
我：「邊本小說咁巴閉呀…」




Q：「咪就係西樓月如鈎嘅早期作品囉。」
我：「咁好唔好睇㗎？」
Q：「睇就好好睇，但有啲夾硬嚟，唔太現實。」
我：「小說就梗係虛構㗎啦，如果寫真實嘅嘢咁使乜睇，睇自己都得啦，戲都係㗎，唔通現實會有正義聯盟同星球大戰咩。」
Q：「唔好亂講，好多作品都係現實搬上銀幕㗎，例如舒特拉的名單。」
我剩係知鐵達尼號一定係假，生安白造整幅裸女人體素描出嚟就作套戲；Die Hard 2都一定係假，我check過飛機起飛速度係快過氣油著火嘅蔓延速度。
我：「乜名單？希特拉的名單？」
Q：「唉，真係同你講多啲都多餘…嗱，故事就係咁，呢個係唔關你有無追佢嘅問題，佢擺到明就係冧你嘅，不過人哋未拍過拖又點敢溝仔喎，喺佢眼中而家一定係覺得你扮單身，以退為進，等佢願者上釣，本來人哋就十五十六個心轆轤轉緊，加埋小鹿亂撞，好死唔死就俾佢撞到你喺度同我私會，結果就認定你係不知所謂嘅男仔再嬲到震。」
我：「好無辜囉！我真係單身…對佢亦無特別…」
Q：「你無得抵賴㗎喇，人哋神女有心，你言之鑿鑿同人講我同你無任何關係，但而家就一齊出現，咁唔係呃佢係乜？」




QQ…作為一個標準港女，又有戀愛經驗，對於韻婷心中所想嘅猜度，我實在係唔敢壞疑…
我：「咁…而家好喇，佢已經嬲死咗我…唔使煩。」
我行去貨架度，攞起咗一罐我平時唔多會睇嘅辣椒沙甸魚，睇下成份入面有無防腐劑，同埋營養標籤顯示會唔會好多鈉，四隻手指鉗住個圓扁罐喺度轉來轉去。
Q：「你唔係諗住放pea唔理呀？」
我：「咁唔係點喎，無論佢鍾唔鍾意我，我都無諗住點嘅，佢要誤會我都無辦法，如果解釋道歉咪好似即係同佢講我有嘢咁…我同佢只係普通朋友嚟，佢點可以干涉我同邊個交流呢？」
Q：「講就咁講，但女仔係蠻不講理㗎啦。」
我：「妳知就好，咁我重可以點，唔通要我氹返佢咩，又唔係我女朋友嚟。」
Q：「諗清楚喎，你要同佢坐埋今個學年。」
回想當初，同QQ鬧咗一日架，唔講嘢幾粒鐘我就已經頂唔順…雖然我而家可以望出窗尋找自己的一片天，自由自在咁飄浮。
我：「聽日再算啦，唉…」




Q：「使唔使我幫你呀，或者我同佢解釋下…」
我：「唔使住，等我諗下辦法先，我又唔係唔識同女仔溝通。」
Q：「我知你識呀，順手溝埋佢囉。」