thriXt Qantasy 純文字安眠之作 (New: - U2K - 一直上架): 620

於是乎，我就喺taste度買咗一大袋嘢，重到咁就只會喺我搦嘅啫，主因都係嗰枝橙汁。
搭咗幾個站地鐵，返到嚟屋企附近。
Q：「不如…都係我行先啦，你唔好跟住我。」
我：「哦，妳行快啲咪得，我慢慢行。」
然後我就望住佢好似隻靈巧嘅兔仔咁喺我面前消失，同佢一齊住，實在會有各種趣事；點知我行下行下經過公司門口，即係酒樓…
健：「呀爽，咁夜先買餸呀？」
佢同屋企人啱啱行出酒樓，佢父母都認得我就繼續行先，掉低個仔喺度同我謦兩句。
我：「係呀…專登出去買，夜啲多平嘢嘛。」
健：「係喎！重要taste添，做乜咁講究，你唔係餐餐便利店或者公仔麪加條菜就算㗎喇咩？」
我：「咁而家有人工，咪食好少少囉。」




健：「哈哈！多謝我啦，我有份幫襯㗎，即係有份出糧畀你，我重專登同屋企人講想食酒樓，不過你咁夜返工我永遠都唔會撞到你。」
我：「咪玩啦…得你一個客咩…」
健：「好啦，唔阻你返屋企，聽日見啦。」
好險，好在QQ失驚無神話分開行，如果唔係就撞到正，雖然QQ話已經諗定一大堆大話解釋…但阿健呢條友又係特別麻煩，以後都係小心啲好。
日子又過咗幾日，mid term已經近在眼前。
俾著以前我點會理，咪臨瞓揭下本書，到考之前再哽多十零廿隻字落個腦度，博撞中可以攞多幾分；就算係大考，頂多咪聽日考邊科今日先嚟溫囉，做人無目標就係咁。
但而家我決定要背晒男仔同女仔性器官嘅所有字，重要識畫，重有佢哋嘅功用！欸…咁我唔係剩溫呢啲嘅，愛蓮說同陋室銘我都重識背一大半，孔乙己嘅潦倒生活又寫到個大概；而數學上面嘅sin同cos，我覺得相對上易，重好過計直線方程。
Q：「吖，你又喺度玩電話？咁唔專心…」
我：「溫咗一粒鐘喇，可唔可以抖下呀。」
雖然一粒鐘唔算好長，但我以前持久力得三個字…




Q：「唔係唔想畀你抖呀，但你一陣又要返工。」
我：「咁都無辦法㗎，我又唔係超人嚟，總要有啲取捨，溫到幾多得幾多囉。」
Q：「嗯…對唔住呀…係我搞到你每個禮拜都唔見咗八九粒鐘，最多我抄定啲重點畀你背。」
我：「傻啦，妳唔喺度嗰陣，呢八九粒鐘我都唔會用嚟溫書啦，肯定係落咗街玩或者打緊機…」
又或者溝到第二條女日日喺屋企研究生物學。
我：「我覺得而家幾好，至少有信心可以全科合格，好過妳科家政隨時炒。」
Q：「作死你呀，竟然敢笑返我！」