為了實現媽媽遺願，我成為了女兒國唐僧: 602

都唔知有幾耐無試過咁樣同女同學hea交流，好似由小學畢業到而家都無，因為識女仔純粹為咗想溝女，而家正好無得溝女，咁樣消耗下生命就嚟得啱啱好…話說小學嗰陣都有啲女同學同我一齊曳㗎，試過掟石仔入去低層公屋單位玩人哋隻狗，實在係十分有趣，如果無俾人捉到嘅話。
W：「係呢，你重有無好似以前咁曳呀？」
我：「無掛…但我唔覺得我以前有幾曳喎，都係鍾意玩啫，又唔係打家劫舍，最多都係改下街邊泊街啲單車個鎖上面嘅密碼…」
W：「你真係好鬼死無聊。」
我：「點都無聊唔過返學啦，聽書真係好悶吖嘛，我到而家都重覺得等塗改液乾係其中一個虛度光陰捱時間最好嘅方法嚟。」
W：「你重好講！你重爭我一枝塗改液呀！」
借人哋枝塗改液嚟玩再整污糟人哋條校裙，係我先做得出呢啲咁高端嘅操作，正所謂煮豆燃豆萁…
我：「我…而家買返枝畀妳啦，sorry。」
W：「唔使呀，你嗰陣都話賠過枝畀我，係我嬲咗你唔睬你咋嘛。」
我：「嬲咗都可以收返枝塗改液先㗎嘛。」




W：「蠢材！重點係我條裙呀！唔係枝塗改液！重有…我呢世都唔會再用塗改液，只會用塗改帶。」
我：「對唔住呀，請返妳食飯囉。」
W：「唔要，無端端做乜要你請我食飯。」
喺我嘅concept入面，幫女仔埋單已經變咗一件好平常嘅事，畢竟細蚊…QQ，我又邊有可能要佢哋餐餐自己畀，況且而家QQ啲錢基本上全部都係我嘅，除咗兩日女僕啲人工。
咁樣同女仔相處又幾舒服嘅，零壓力。
W：「係呢，咁你而家會玩啲乜呀？」
我：「而家，都係打機多咁囉，如果妳有玩傳說可以一齊㗎。」
W：「無喎，唔好意思，我有試過玩吃雞，不過玩多一陣就發現自己都係手殘放棄咗，無謂場場開嚟送人頭啦…」諗返起QQ都算係罕見嘅女仔，竟然會玩傳說重玩得唔太差。
W：「不過我會玩Steam，而家玩緊The Sims。」
我：「起屋？我之前都有玩過一排…」




W：「嗯，隻game嘅本體雖然好平，但啲DLC加加埋埋就好貴，樣樣嘢都要畀錢買。」
我：「哈…我之前download嘅係齊DLC嘅crack版，見到太多嘢唔知邊樣打邊樣，玩咗一陣覺得太複雜棄咗。」
W：「你打機都係咁曳。」