thriXt Qantasy 純文字安眠之作 (New: - U2K - 一直上架): 581

我：「你口口聲聲話補償，非禮完我可以點補償？」拜託…千祈唔好叫我非禮返佢，雖然…我好想踢到佢蛋蛋內出血睇住佢冧低。
肥：「我畀返錢妳吖。」佢攞個銀包出嚟。
我：「夠喇！唔係有錢大晒㗎，我唔係賣肉，唔會收你啲臭錢，唔該你唔好侮辱我嘅人格同身體。」
我䁽到佢銀包入面有好幾張五百蚊紙…唉，Queenie…唔好咁呀，雖然妳而家窮到燶，但做人一定要有返啲骨氣。
肥：「唔係…我無呢個意思…係因為我搞到妳無咗份工，所以點都想賠返啲人工畀妳先。」
我：「唔使喇…我會搵其他嘢做，我已經好頭痛，唔好再煩住我得唔得…」
肥：「唔得，如果我補償唔到妳，妳實會嬲我成世…」嬲多你一日都覺得多餘，不過怕且又真係會成世都記得你呢件大嚿衰。
我：「無意思㗎…你咁嘅款，去到邊都唔會受人歡迎，唔止我，睇怕所有女仔都憎你。」
肥：「我知呀，我又肥又樣衰，口臭黑人憎，從來都唔會有女仔黐埋嚟㗎啦…係好在我有少少錢，先可以成日嚟女僕cafe睇下妳哋…」
我：「咁你重要非禮我！係咪想全世界女仔咒你去死先安樂？！」




肥：「無呀，對唔住！我唔係想非禮妳…」一路講，佢又跪咗喺度，一時就串柒柒，一時就不停跪女人，都唔知係乜心態，睇怕都就中間分界。
我：「撩起我條裙唔叫非禮，咁點…樣先叫非禮？！」我係…好想…喺中間加粒粗口字喺度，不過我始終都係出身高貴，喺公眾場合想保持儀態。
肥：「對唔住！係我錯…我…其實唔係想䚎妳裙底，只係想知妳有無打底咋，只係撩高咗勁少…」
乜卵…？！好無稽嘅辯解，但正正就係因為咁唔合邏輯，我又有啲信佢真心咁諗，真係黐Q線…
肥：「同埋，今日係愚人節，想同妳玩下咋嘛…」
愚人節可以隨便撩女仔條裙，咁兒童節咪可以喺條街度任揸女人嘅波波？救命…佢堅傻㗎…
我：「你唔好走去強姦完個女仔同佢講今日係愚人節？！」我好火，佢唔止黑人憎，重係超級低B，有無人可以畀條皮鞭我，等我當佢係馬戲團啲動物教訓下！