為了實現媽媽遺願，我成為了女兒國唐僧: 579

不過，我真係好無用。
就喺我諗緊嘢嘅時候，無端端有團肥肉衝咗嚟我面前，喺西洋菜南街大馬路上面跪咗喺度。
時運高，我乜都睇唔到，向橫行咗一步，再繼續向前行；點知過咗十秒，件物體又追咗上嚟，重施故技…屌，佢到底想點呀…我又繼續無視佢走開。
肥：「咪走住呀！我喺度㗎！」佢喺我背後大叫。
我：「我唔識你㗎！走呀！」
我係有少少驚，話雖呢度係大街大巷，周圍都係路人，佢唔會做到啲乜；但何小姐講過，旺角隨便都會撞到一個變態，又起底，又跟蹤，又偷拍，我係預計唔到啲黐線佬會對自己打乜壞主意。
肥：「Kuromi！我嚟道歉㗎，對唔住！」佢又即刻跳咗嚟我面前，跪咗喺度，成條街嘅人都望住我哋；你知啦，呢條街，除咗情侶鬧架之外，有時重會有街頭戲劇表演，我唔想有任何觀眾，千祈唔好有人貪得意拍片，我絕對唔想出名。
我：「唔使客氣喇，你同我即刻消失就得。」
肥：「求下妳原諒我啦，我真係會改過㗎！」
佢實在係黐線得好勻洵，竟然喺條街度向我叩頭認錯，佢啲動作係好得人驚，但睇到佢咁嘅樣，我又唔覺得佢係想再做啲乜嚟傷害我，只不過佢咁樣煩住我已經對我做成極大嘅滋擾，亦令到我好尷尬；而家嘅我乜都唔想諗，只係想盡快返屋企休息下。




我：「咁你就改過啦，唔好再煩住我。」
肥：「妳原諒我啦，Kuromi女僕，我以後都唔會再做啲咁嘅嘢，唔好嬲我啦。」
我：「咪再講呀！我唔係女僕喇！你條粉腸攪到我無咗份工喇！」
肥：「吓？！佢哋炒咗妳？點會咁㗎…我而家上去認錯，求佢請返妳啦。」
我：「你唔好黐線得唔得？我唔想再做女僕呀！」
肥：「吓…點解唔再做女僕呀？」
我：「因為我唔想再對住你呢啲閪客呀！」
肥：「對唔住！係我閪！我知錯喇，Kuromi女僕唔好嬲我啦，我會補償返妳㗎。」
我：「唔使呀！同埋唔好再叫我做女僕！」
肥：「咁，Kuromi女王…唔好嬲啦。」




我：「走啦，我唔想再見到你，我好驚你。」
我以為可以打發佢走，點知佢真係追上嚟又跪喺度，我走開佢又跑返上嚟，直至去到彌敦道等過馬路…你個仆街死肥仔唔止係賤肉橫飛，重要係賤骨頭嚟，明明頭先喺餐廳意氣風發，做乜而家笠晒水咁；睇到佢咁嘅樣，我真係想當佢波咁一嘢踢開佢，但我知道佢實會轆返過嚟…