為了實現媽媽遺願，我成為了女兒國唐僧: 577

我：「對唔住，係我無諗清楚。」
何：「而且，對方都只係一個細路嚟啫…」
我：「係…我反應係大得滯…」
我承認…我係因為打從心底討厭呢個肥仔，覺得佢好嘔心，所以當佢做錯事嘅時候，就將我對佢嘅厭惡一併發洩晒出嚟…或者，如果佢好樣啲，似返個正常嘅毒男，我都係只會笑笑口咁教訓下佢就算。
畢竟，我入面只係一條打底褲，無嘢俾人睇蝕…而且我都未至於係嗰啲俾人掂兩下就會喊嘅純情少女…
只係呢個肥仔太黑我憎，就算佢無做錯嘢我都想鬧佢一鑊。
何：「我啱啱諗過㗎喇，Queenie，妳真係太細個，女僕侍應呢份工作對妳嚟講可能比較困難，或者…都係等妳再大少少先嚟搵我啦。」
我：「女僕長，好對唔住，我下次唔會…」
何：「Queenie，唔使咁緊張，我唔係話妳做錯嘢所以炒妳，但係，如果妳繼續留喺度返工，難保唔會見返嗰個肥仔，又唔知佢會做啲乜，萬一佢起妳底，跟蹤妳，接妳放學，到時點算？而且好似頭先呢啲事，喺呢度都偶有發生，我都係想保障返妳，同埋保障返公司同我，先希望妳唔好堅持喺度做嘢啫，萬一妳遇到啲更加唔好嘅事，驚動到妳家長，或者警方，到時我都唔知點算，好多嘢話唔埋㗎嘛。」
我：「女僕長…」




何：「唔好扁嘴啦，我何嘗唔想妳喺度幫我手呢，妳生得咁靚女，身材又好，無不良嗜好，整齊企理，講嘢正正常常，應該都唔會偷懶，不知好過幾多妹啦…但正正就係因為咁，我先唔想妳受到傷害，如果妳係嗰啲讀唔成書滿身紋身食兩枝煙嘅MK妹，我都唔得閒理妳死活啦。」
我：「何小姐，我明白㗎喇。」
何：「不過我想問多妳一次先，妳屋企經濟狀況係咪好大問題，無咗呢少少錢會生活唔到？如果係嘅話我或者可以諗下點樣搵朋友幫妳，雖然都唔知有啲乜係啱妳做…」
我：「唔使喇，我生活無問題，嚟做嘢想體驗下啫。」其實…我都唔識判斷我而家有無經濟困難。
何：「咁就好，Queenie妳都係畀心機讀書先啦…呀，差啲唔記得，我要出返今日糧畀妳先。」
然之後何小姐攞咗三百蚊出嚟畀我。
我：「太多喇…我今日先返咗兩粒鐘。」
何：「妳收咗佢啦，妳返得嚟就預咗做本身嘅時間，同埋頭先影相啲錢都要畀返妳。」
我：「唔好啦…我辦事不力，呢啲不義之財…」