為了實現媽媽遺願，我成為了女兒國唐僧: 498

食完佢就瓹返入個被竇裡面，睇嚟佢呢個禮拜真係好唔夠瞓，咋一聲就瞓著咗；而我，即係又要返去我老竇嗰邊唔香嘅被竇度瞓。
當然，今晚嘅晚餐又變返做我負責。
如是者，開心嘅日子話咁快就過咗兩晚。
Q：「星期三喇喎，你爹地…係咪肯定聽日先返？」
我：「佢話過返去三日，通常都唔會漏夜返嚟。」
Q：「你係咪肯定㗎？Confirm下先會唔會好啲，我有啲擔心喎，如果佢突然返嚟嘅話…」
呢樣嘢其實當然唔使佢講啦，我自己都驚到震，但係要諗下點樣試探先唔會露出馬腳。
於是乎到咗六點到我就voice message老竇。
爸：「呀仔？搵我做乜呀，煮緊飯呀。」
我：「爹地煮飯畀爺爺嫲嫲？」




爸：「梗係啦！唔通煮畀邊個喎…」
我當然就唔會懷疑佢煮飯畀小三食啦…呀唔係，媽咪都走咗咁耐，重小乜鬼三吖。
我：「咁有乜嘢餸呀？」
爸：「清遠雞，梅菜肉餅，白灼蝦，蒸水蛋…做乜呀，你無啖好食呀？今晚食乜呀？」
我：「四寶飯。」我當然隨口噏。
爸：「…，都唔係差吖，得喇，聽晚返嚟煮好餸畀你食喇，有乜想食呀？」
我：「欸…豉椒炒蟶子。」啱啱諗起酒樓執枱災場。
爸：「嗯，知喇，我煮嘢呀…畀你同爺爺講兩句…」
我：「喂，爺爺，我係阿爽呀…嗯，我有讀書呀，會乖㗎喇…香港唔係好凍啫，我有著夠衫…暑假我會上嚟探你哋㗎喇…好呀，我想去長隆玩好耐㗎喇…嗯，我都要煮嘢食喇，下次再講，bye bye。」
老人家，永遠都會當啲孫係細路仔，雖然我又真係細路仔，一個衰咗十一又成日同女仔一齊住嘅細路仔；而且講嚟講去都係嗰幾句嘢，我又永遠都係覆返嗰幾句，不過佢哋從來唔會覺得厭；計我話去長隆玩其實好鬼貴，留返啲錢喺廣州食嘢行街打機重化算，包括買大陸版LEGO同埋高達。




Q：「哈，你真係會變到成個小朋友咁。」
我：「我明明就係小朋友，而且係又乖又可愛嗰隻。」
Q：「乜係呀？睇下你部電腦個E drive再講。」
我即時無言以對，順帶一提老竇返嚟我係會掹走條harddisk線佢，費事佢唔小心睇到會一時興奮得滯，激親天上面嘅媽咪就唔係幾好啦。
Q：「總而言之…你肯定佢聽日先返嚟？」
我：「實係啦，佢重煮咁多碟餸，食完洗完都八九點，鬼返得切嚟咩，嗰度係廣州呀，唔係深圳。」
Q：「既然你咁講就信你啦，佢係你老竇，你最清楚佢嘅習性。」
我：「咁妳今晚有無乜嘢想食呀？」
Q：「無特別，只要係你整畀我食就得，嘻。」
當我同佢一齊住，就會唔記得晒自己係人哋個仔同孫，而佢都會拋開家道中落富家女嘅身份，懶理阿媽同邊個男人搞三搞四；一切都係咁自然平常，就好似我哋從來就應該住埋一齊咁。




我：「爹地佢星期六晏晝就出船㗎喇，我諗妳嗰日中午打後過嚟就可以，嚟緊兩晚…又要辛苦妳捱埋佢。」