為了實現媽媽遺願，我成為了女兒國唐僧: 466

啦啦啦，終於有晚飯食，開心心，同QQ一齊食飯最幸福，心境開朗。
我逐碟逐碟將三碟點心攞上枱，唔好問我點樣可以一次過喺鑊度蒸三碟嘢，呢個係被獨留在家嘅公屋兒童不能說的秘密；然後瀝乾個公仔麪放碟，成碗咖喱雜錦倒晒落去撈，咁樣就連味精粉都唔使落，但我會再加少少麻油同辣椒油。
Q：「睇嚟，你準備咗好多嘢喎。」
我：「嗯，努力運動完梗係要食返餐好啦。」
Q：「你咁多點心，想問下有無茶呀？」
我：「嗯！應該有車仔茶包，我搵下先。」
講完之後我又即刻仆返入廚房，沖咗兩杯茶出嚟，平時唔敢同QQ喺同區嘅地方食嘢，去自己公司幫襯又好似怪怪哋，可以咁樣喺屋企飲茶都唔錯吖。
我：「使唔使蒸多包蝦餃畀妳呀？」
Q：「傻嘅咩，邊食得晒呀，我咪話咗頭先喺學校食咗一輪嘢先返嚟囉，嗱，個雞扎我要腐皮同魚肚，其他就交返畀你嘞。」
乜易家啲小朋友真係咁曳嘅。順帶一提，傳統雞扎入面嗰四樣嘢係雞肉、豬肉、魚肚同埋豬肚，如果你見到蟹柳、芋頭、冬菇、火腿甚至係你唔識分係咪魚肚嘅豬皮，呢啲都係減輕成本嘅製作，當然一般屋邨出品就唔好太高要求喇。




我：「係呢，妳啲…女神friend係咪出晒嚟㗎喇？」
Q：「嗯…太致上，平時嗰幾個…」
我：「啊，點解係大致上嘅？」
Q：「唉，女仔關係好複雜㗎嘛，有時有呢個就無嗰個，例如Zilvia有個貴婦friend嫌我哋太嘈太不知所謂，通常都唔會黐埋我哋一齊玩。」
我：「但同妳哋食完飯，感覺上都幾正常吖。」
Q：「你哋喺度，而且又著住校服，點都會收斂啲嘅，平時有時真係好癲㗎，講仔都可以眉飛色舞，嚇死隔籬枱嗰種。」
我：「不過，估唔到妳哋四個咁大分別。」
Q：「咁女神都有好多種嘅，唯一共通嘅嘢咪就係一樣難服侍，同埋有啲樣囉，呵呵。」
我：「我諗…都唔止係有啲㗎喇，係呢，其實妳哋幾個邊個最富貴呀？」
Q：「喂喂喂…其實我已經唔當自己係女神㗎喇，唔好再討論呢樣嘢得唔得？」




我：「噢，Sorry…不過點解妳話佢哋麻煩嘅？我見Uranus都幾好人吖。」
Q：「呀，係咪你睇啱人呀？嘻嘻…」
我：「點會喎，先食得嗰一餐飯，傻嘅咩，對住女神一見傾心係自掘墳墓嘅行為嚟㗎。」
就好似我而家呢個傻仔咁。
Q：「咁可能，三千米長跑男選手睇中咗我哋嘅千五米金牌女選手呢？」
我：「乜…乜喎…我重識跨欄㗎！」