為了實現媽媽遺願，我成為了女兒國唐僧: 444

豬：「唓…又唔係我想做嘅，今日星期三啫…」
「哈，聽日咁多決賽，又要影相又盛，後日就放假，咁你話畀我聽要幾時謦好晒啲細節？」
豬：「得啦，都重有成個下晏，總之聽日安排好晒囉。」佢彷彿變咗維尼身邊隻豬仔。
「信唔過你！呢個lunch諗掂佢，我看實你食飯！」
原來，有得同個大美人食飯，都會面青口唇白。
Q：「Uranus？過咗嚟嘅，做乜呀？」
嘩！一個凍不提防，右女神突然之間喺我左邊彈出…我記得喇，呢個女生都係女神黨嘅一員，但平時無紮起頭髮同著校服斯文啲，所以一時唔認得…
U：「過嚟追數呀！啲仔真係麻鬼煩！」
Q：「哦，不朽㗎啦，成班好似未戒奶咁…」
頂妳個肺吖！唔知邊個返緊工搵錢養妳呢？！




U：「總之你跟住我去食飯，我要睇住你做嘢！」
豬：「細龜你一唔一齊呀？」
龜：「無乜所謂，我自己一個人都得。」
豬：「陪下我啦，萬一我俾個殘暴不仁嘅女人碎屍，你都可以去死因庭幫我做證人吖嘛。」
小學雞…永遠都咁鍾意挑釁異性。
U：「你試下再講，我掉你落攪拌機打啲豬油出嚟焗曲奇。」古有人肉叉燒包，今有肥豬油曲奇…
豬：「唔好呀！但焗出嚟一定甘香酥脆。」
Y：「咦，係咪…一齊食飯㗎？」又多一件，呀，唔係，係兩件，隔籬重有個唔出聲嘅Zilvia。
U：「係呀，不過我要看住呢隻動物。」
Y：「嗯？隻肥嘢求妳收佢做主人呀？」




U：「妖…唔係呀，總之就麻鬼煩！」
Q：「無所謂啦，咁咪一齊食囉。」
四個女神喺度，氣場實在係不容小覷，呢種壓迫感呢…
健：「欸…咁多人嘅…阿爽你…食唔食飯㗎？」
我：「飯就…點都要食嘅…」
一時之間我都決定唔到，如果我一條友自閉就梗係同返健康兩個食啦，但呢邊唔理肥豬又好似有啲衰，而且QQ都喺度…雖然同QQ食飯唔算啲乜。
健：「算啦，唔阻你，我同阿康行先喇。」
佢跑返落去搵阿康，睇嚟深知此地不宜久留。
豬：「啱喇，不如阿爽你幫我諗下點燒嘢食？」
U：「行啦，無時間呀！再講星期六食原隻燒豬。」




結果…我哋一行七條友行咗去附近商場嘅一間茶餐廳，哦，原來女神都會食平民嘢嘅，不過呢附近又好似真係無乜貴嘢食。一路上四個女神帶頭行到招搖過市咁，最攞命係佢哋四個都只係著住夏季PE衫褲，應該係朋輩壓力下無人敢著多啲布，成條街都望住晒…而我哋三個男仔就好似隨從咁喺後面跟住佢哋，肥豬喺度睇緊電話地圖app，細龜繼續漠視一切玩乃木坂，而我就…欣賞美腿。
QQ，青春女仔腳；Yvonne，上闊下幼嘅港女腳，咁其實係闊小小啫，唔會話肉酸；Zilvia，病氣筷子腳，都係纖巧，未至於見骨；Uranus，肌肉線條美，本來QQ都唔差，但小巫見大巫。
再望上少少，四對美女pat pat，真心黐線，再昅落去會飯都食唔落，但Uranus感覺上好似正啲…其實細龜係咪人嚟㗎？眼前明明有四個真嘅美女。