為了實現媽媽遺願，我成為了女兒國唐僧: 436

向上食師姐友誼交流，向下調戲師妹搵下有無守宮砂，諗起都夠晒爽歪歪，你睇下話口未完文書同財政姐姐就已經坐咗喺佢嘅左手邊；正當我想開口大嘆世風日下嘅時候…點知，我見到QQ直接坐咗喺佢嘅右手邊，重要明明我喺隔籬但望都唔望下我。
屌！點解會咁㗎？妳呢個不守婦道！功利至上！寡廉鮮恥嘅賤女人！臭女神！笨QQ！
雖然呢啲場合一男一女並排坐會好引人注目，平時上堂就話無得揀啫，但我都會寄望可以坐佢前前後後謦兩句㗎嘛，話晒都叫同桌吖，點知佢竟然大模廝樣坐咗喺主家席上面…
其實我都明嘅，佢同自己班啲女仔又唔係特別friend，啲姐妹又唔喺自己班，與其研究要同邊個自己班嘅女同學坐，倒不如直接搵個最有用處嘅位置坐落去；女神黨從來就係一個跨班跨級嘅非明文規定非物質文化遺產嘅暗坎組織，我懷疑佢同文書財政姐姐重熟過自己班啲女同學。
明明今朝重喺度彈我雞雞，而家竟然扮唔識人…真係嬲到我吖，不過我都明嘅，算！唔同妳呢啲小女人計較，我識趣自己走開另謀高就。
越嚟越多人坐定定，等我望下個市係點先；自己班嘅…咦，我後面個女仔原來都係紅社喎，不過我坐過去可以做乜呢？問佢平時我兀凳有無煩到佢？然後就無嘢講…平時佢就唔出聲文靜到嚇死人；再過少少有個低B煩膠口水佬，佢無嘢叻，最叻就係講模型，尤其係高達，但佢唔係一般嘅黐線，佢會由0079講到去創戰者，其實我唔係唔鍾意高達，但自從蛋蛋之後就一套爛過一套，而家已經唔興，加埋佢會係咁問你有無用模擬器玩返以前啲機戰…最慘係我而家根本無錢亦都無時間玩高達。
再周圍望下先，Alpha師兄，Beta妹妹，Charlie Brown，Mr. De Beers，伊莉莎白…嗯，老吹㗎咋，其實我一個都唔識，再望上少少我見到一個幾有趣嘅組合，於是就行咗上去。
我：「細龜，肥豬，乜你兩個識㗎？」
肥豬係乜水？係一個性朱嘅男仔，曾經我咪講過中一嗰陣作過我的夢想嘅，佢就係嗰個好有霸氣嘅肥仔囉，咁啱佢又姓豬喎，正所謂近豬者肥…
豬：「我屌你呀！邊個俾你咁樣叫我，隻揪啦！」




唔會嚇親大家呀可？以前中一嗰陣，早就成日同佢扭打埋一嚿，所以早就慣咗，而家只不過係敘敘舊啫。佢一嘢喺張凳度彈咗起身撲埋嚟，伸出兩隻豬手，而我已經自然反應咁推返兩隻手出去。
豬：「仆街！你唔好再縮手呀！」