為了實現媽媽遺願，我成為了女兒國唐僧: 416

我：「原來你鍾意平胸妹。」
健：「咪玩啦，只係覺得佢好似一個謎咁，會令人好想知道佢究竟係點啫。」
我：「可能人哋對你無興趣先唔show你啫。」
健：「你鍾意點諗就點諗啦，懶得理你，好好地睇你個Q字頭啦。」Q字頭…好似黑社會大家姐咁。
嗱！我X字頭㗎！得罪我就孖叉你阿媽！
嗯，睇嚟可以參考下，第時遇到惡人可以做下樣。
除咗Q同埋Z，同場重有Y喺度，不過佢就無換衫嘞，只係撓埋兩隻手喺場邊做觀眾，個樣有啲鬱鬱寡歡咁；我同佢唔小心對望咗一眼，然後我以秒速五厘米嘅反應避開咗佢嘅眼神；咦…咁樣係咪即係我輸咗？其實我無理由怕佢㗎…是但啦。
但我真係有啲驚，如果我哋兩個死都唔避開，對望足成分鐘都唔知點算，萬一佢以為我愛上佢就唔係太好啦，我未至於厚面皮到笑笑口解釋我望妳只係因為愛『上』妳咋。
跳高呢樣嘢就無乜好講嘞，因為條bar只係做下樣set得非常之低，中一小妹妹應該都可以跳到過去，主要都係睇啲靚女跳過去嘅優美姿態；其實又唔係話個個都咁靚嘅，但跳高呢個動作就點都會為佢哋加分，至少個重點唔再係停留喺個樣上面。
值得一提嘅係Zilvia嘅一頭長髮時不時都會戟到條bar整跌咗，而QQ就會笑佢加幫手執返起條bar上去，我諗佢聽日一定會紮起頭髮嘅…無理由比賽會咁樣讓賽法。


班女仔跳到咁上下就讓返個場出嚟畀啲仔，同一時間好多男觀眾都開始四散，真係世態炎涼到吖…接住落嚟就輪到啲仔喺度也文也武表演好威威咁，一口氣就將條bar升高成三十cm；嗯，雖然呢篇文唔係女仔視角，無乜寫佢哋春心動發晒姣嘅場景，但的確都有少少女仔留喺度睇表演嘅，當然就唔係Q、Z、Y佢哋啦。
Queenie臨走嗰陣行埋去瘟神身邊同佢講咗兩句嘢，然後就同埋另外兩個女神離開向更衣室方向行，經過我身邊嘅時候望都無望我一眼。
健：「無嘢睇喇，走啦。」
我：「我留多喺度一陣，你走先啦。」
健：「搞乜鬼呀，唔通你雜食到仔都啱？我有啲驚咁喎。」我唔信佢驚，從來都無人喺我身上聞到過一分基味，最多係話我無盡嘅鹹濕變態。
我：「唔係呀，可能我想跳埋一份啫，你返過去繼續睇Bubble姐姐啦。」
健：「唔啦，睇咗幾日，日日都係咁嘅啫，咁…夜啲有無興趣一齊練跑呀？」
我：「練乜鬼吖，留返啲體力養精蓄銳聽日先一次過爆出嚟重好啦。」其實我只係唔想嘥時間畀佢。
健：「咁又係，聽日運動場見啦。」
講完佢就走咗，而我留喺度嘅原因，在於聞到啲有趣嘅氣味…