為了實現媽媽遺願，我成為了女兒國唐僧: 410

康：「唉，最後五分鐘喇，好唔捨得…」
健：「聽日落場再睇啦，你重有三年㗎，啲中六生就真係唔捨得。」
我：「嘻嘻，使唔使偷偷用電話影低留念呀？」
由於時移世（—唐/勢—清）易，而家喺學校放咗學係可以攞電話出嚟用嘅，但就只限同人聯絡，又或者進行與學習有關嘅事宜，例如上網搵資料查字典，用電話嘅計數機App都係無問題嘅；但你夠膽喺學校大模斯樣咁打傳說嘅話，恭喜你，俾先生見到實會開心死；另外，學校為咗保障自己同所有同學，喺學校未經批準影相錄影都係禁止嘅；當然啦，規矩還規矩，理嘅人都唔係太多。
康：「咪玩啦，你幫我影就差唔多，我部六年前嘅電話，影完出嚟都唔知係乜。」
六年前…都唔係太差嘅，主要係佢呢部屬於cheap cheap嘅型號，好似話得8GB…
我：「唔制，幫你影嘅話我俾人捉到咪好蝕？係呢，你部…應該都係Android嚟，可以玩到乜嘢game呀？」
康：「新嘅大型game一律裝唔到，可以玩返接龍，數獨，射下魚呢啲單機game…」
我：「咁睇嚟你真係可以專心溫下書。」
康：「妖！咪笑我啦，我夠鐘行喇，你哋慢慢。」




傷心的一個走了，然後我又發現呆呆的一個。
我：「喂！細龜！你喺度搞乜呀？」
然後佢就慢條斯理咁行過嚟。
龜：「無呀，我啱啱…經過咋嘛…」
我：「咪扮嘢啦，呢個時候經得過嘅都係為咗昅女㗎啦，嗱，你唔好話唔係喎，我明白嘅。」
龜：「乜喎…我睇女仔…使乜喺度睇。」
其實我心入面都有一種共鳴，係嘅，使乜喺度睇，重要得過睇字，上年呢個時間我即刻走咗去搵Carmen啦，不過今年我鍾意嘅女仔喺自己學校，花多啲時間喺度都啱嘅；係呢…QQ又話今日放學有嘢做，唔會咁快返屋企，重以為佢會蒲埋去啲啦啦隊度埋堆，點知等咗咁耐都唔見佢，唔知去咗邊呢？
我：「唔好咁啦，我都知乃木坂啲女仔好正，但有時都要返返嚟三次元㗎，係咪呀？」
龜：「嗱，我唔係嗰啲二次元宅男嚟，我先無佢哋咁毒，日日對住啲卡通公仔…我鍾意嘅都係三次元，全部都係真人嚟…」
我：「係真人…但喺日本咁遠，呢度啲女仔就喺眼前喎，點同呢，你咁啱經過都係想睇女啫。」




龜：「比較下啫，睇完就更加知道個分別，發現睇唔上呢啲…唉，唔知幾時乃木坂先會嚟香港表演呢，2018年之後都無再嚟過…」
講下講下佢又偷偷攞部電話出嚟抽卡，左邊呢個係咁課金畀日本妹，右邊呢個就傻下傻下咁送skin…其實我已經無眼睇佢哋，呢個年紀嘅少男總會有各式各樣嘅煩惱；又，我自己都唔係好得幾多，難逃被困情網，只係我嘅case比較光怪陸離，同個有仔嘅女神同居曖昧不清，分分鐘講都無人信。