為了實現媽媽遺願，我成為了女兒國唐僧: 405

以前同女仔坐，就算唔係friend通常都會食過一兩次lunch，撐枱腳怕尷尬嘅話就會拉多兩三個人當聯誼下囉；但QQ佢真係好堅持，唔想招人話柄之餘又同佢啲姐妹互相牽制，咁我都無理由要佢難做嘅，反正晚晚都一齊食。
不過好似咁樣兩個人落嚟樓下食嘢，感覺上係有啲分別，心入面浮現咗一種平淡嘅幸福。
Q：「咪食住。」聽到命令嘅我放低筷子。
其實我都無得反抗嘅，佢就喺度rearrange啲餸，夾咗一嚿腩柴過嚟，換走我一嚿牛肺同一塊金錢肚，正所謂靚女喺你面前，劏咗個肺出嚟畀佢都得，呢一下真係夠晒夭心夭肺。
我：「妳鍾意食牛雜做乜唔嗌牛雜喎？」
Q：「因為我唔想食牛腸。」
我：「吓…肚同腸有乜分別喎。」
Q：「隻牛牛食咗嘢呢…喺個胃度就重係草嚟嘅，落到腸就變咗臭臭，咁唔想食腸都好正常啫。」
我：「咁人哋洗過烚過㗎嘛，即係話所有腸，例如豬腸鵝腸生腸妳係咪都唔食？」
Q：「生腸我食，因為生腸都唔係腸嚟。」


我：「乜話？！生腸唔係腸咁係乜？妳唔會同我講係蚯蚓嚟㗎可？」
Q：「你寫啲中文字就蚯蚓嚟，生腸係豬仔…吉百利嘅輸卵管，所以好乾淨。」
其實我寫啲中文字都唔係咁差啫，話晒小學成日要罰抄，寫得鶻突係要重抄㗎。
我：「原來…輸卵管…有咁大條…係呢，乜吉百利原來係女仔嚟㗎？」
Q：「呢層…梗係啦，男仔豬點可以同我一齊瞓喎！」好彩我唔係豬，我係男人。
擺到明佢係無幫自己隻公仔諗性別嘅，只係臨急臨忙應酬我，從此…吉百利就變咗豬乸。
Q：「喂，你夠唔夠飽呀？」佢食完一大半咁樣問我，睇怕個重點就唔係我飽唔飽。
我：「妳係咪重想食呀，傻豬？」
Q：「不如，我同你再share多一份吖，好唔好？」
我：「當然可以啦，咁妳想食乜。」


Q：「我想食…豬手撈粗，我見都唔係好貴。」
香港地食麪，不成文規矩嗌撈通常都係比湯嘅多三分一到一半，價錢就貴十蚊八蚊，搭兩條菜落去，有碗大地魚韮黃湯另上，正常人只會嗌撈麪同撈粗，夠膽嗌撈米嘅全世界會當你係外星人望住你，有啲刁鑽啲嘅鋪頭重會有汁底揀，分別係蠔油，薑葱同腩汁，鍾意味精嘅小朋友重可以揀蠔油溝腩汁…對於以上嘅冷知識，外國人通常會變咗丈二和尚摸不著頭腦。
我：「梗係得啦，嗰少少錢，我啲利是錢重有排搣，使唔使再加多三粒雲吞雙拼添呀？」
講真，我自己好少食撈，一嚟呢間鋪嗌撈無得跟餐連嘢飲，二嚟通常係啲識搵錢嘅大人嚟食讕係豪氣啲就會鍾意嗌撈。
Q：「唔使喇，雲吞屋企都有，而家我識自己整嚟食。」無錯，女神為咗食係會自己努力落手落腳…
我：「嗯，咁我嗌啦。」
Q：「多謝交叉仔。」
其實養女神係一件好爽嘅事，可惜嘅係佢並不是我嘅女人…幸福並唔係必然，亦都好難恒久，我只知道而家呢一刻係叫做曾經擁有。