為了實現媽媽遺願，我成為了女兒國唐僧: 379

畢竟…佢同Yvonne夾埋嚟一齊笑我係其中一個維繫佢哋友情嘅工具，如果QQ覺得咁樣會令佢過得舒服啲嘅話，我願意犧牲。
我：「咁…妳就唔驚同瘟神會傳緋聞咩？」
Q：「關於呢個問題…又真係唔會㗎喎，因為我哋本身就係嗰堆人，例如Yvonne同綠社個副社長，Bubble個同班男同學都好熟，有時又會同學生會班仔玩得好埋，但好似…本來就係咁，無人覺得有問題，就算會擦出火花，可能都只會收到祝福。」
真係唔到啲普通學生唔鄙視佢哋㗎囉，就連阿健都唔多鍾意佢哋扮上菜；呢種講法，就好似話緊佢哋呢啲上流社會達官貴人一齊social嘻嘻哈哈係一種特權，男女之間有啲乜就係社交禮儀，而我哋呢啲平民親近女神，好啲就叫當兵，衰啲就叫唔知醜癩蛤蟆想食天鵝肉。
咁我都知配QQ唔起嘅…亦都無資格話佢，好似我呢啲咁嘅人，喺週記入面嘴炮下已經係極限。
Q：「我知你諗乜嘅，你都係想話我咁正，如果瘟神有多啲機會同我相處就一定會動情，係咪？」
我唔好意思話佢自戀，因為確實佢有呢個本錢。
我：「唔知呀…但我頭先見佢好開心。」
Q：「就算係又點，佢鍾意我，對我傾心，又關我乜嘢事呢？」女神…呢番說話…
我：「吓…個男仔鍾意妳都唔關妳事？」




Q：「又係你教曉我嘅，男仔係靚女都鍾意㗎啦，想食埋佢哋添呀，如果我嘅靚係一個客觀事實，咁按道理所有男仔都會鍾意我，多佢一個唔多，少佢一個亦都唔會少，呢個係佢嘅自由，但如果個個都鍾意我，我又理得邊個呢？況且，純粹因為我正而對我傾心嘅男仔，我都唔想理佢哋囉，我又唔係為咗佢哋而存在嘅。」
好一個女神，一句KO晒一船人，包括埋我。
我：「妳覺得無問題就得…妳鍾意囉。」
Q：「低B仔，都唔知你有乜醋好呷。」
呢個時候，佢坐返起身，摵一摵條裙再揄起，然後交叉手咁除咗條裙出嚟，剩返件上身嘅白恤衫喺度；可能因為冬天唔會睇到嘅關係，佢入面戴咗個黑Bra而家喺我面前透出嚟，下面就係一條竹炭色嘅底褲…咁其實我平時成日都睇住著底衫褲嘅佢，所以無乜嘢嘅。
Q：「如果你要呷醋嘅話，咁我諗其他男仔要排住隊嚟上門追斬你，我好擔心你嘅安危。」
佢一路講一路解開恤衫上面啲鈕。
Q：「想我喺學校對你好啲，一係你同其他人發出當兵宣言囉，我或者會派下兵糧畀你嘅，但你唔好同人講你要追求我，我唔想你難受。」