為了實現媽媽遺願，我成為了女兒國唐僧: 365

鄧：「咁孔乙己臨死前爭酒店幾錢？」
我：「十九文錢，不多也不少，多乎哉？不多也。」
也就這樣，課室的氣氛都被我逗樂了。
鄧：「魯迅借孔乙己呢篇文章想帶出乜嘢意思？」
嘩…做乜突然變咗出題pattern嘅？犯規呀！
我：「呢個…呢個…係叫我哋…唔好學孔乙己咁廢柴，讀死書…搵唔到食要做小偷。」
QQ已經趴咗喺張枱上面嘰嘰笑。
Miss Tang就喺黑板上面寫咗我個名喺度，再喺下面寫『欠一份課後練習，不多也不少』。
鄧：「這一回要現做，內容要好，放學留堂自己做，做完就交畀我。」
我：「Miss…邊有人中三重罰留堂㗎…」




咪係囉，又唔使搭校巴放學，留乜鬼啫，大把人每日放學都賴死喺學校唔知做乜唔走㗎啦。
鄧：「理得你，唔叫留堂囉，總之今日內要交畀我。」雖然佢無乜威嚴，但我總唔可以無視佢。
我：「但係今日happy friday喎，如果阻到妳放工嘅話，小人實在罪該萬死！」
鄧：「客氣喇，我落堂要開會，無四點半都唔走得，多謝你個小人等埋我收工。」
鳴鳴鳴，我今晚重要返工，我明明想瞓個長晏覺…
終於，歡樂嘅課室回歸上課嘅平靜…呀！係嘞…
我：「Queenie…咁睇怕…今日放學唔使搵瘟神。」
Q：「無所謂呀，佢哋今日有排忙，肯定六七點先走得，我音樂組都有嘢搞，等你做埋功課先囉。」
大家都可以估到，雖然QQ喺學校未算係最活躍嗰堆，但總會有啲嘢玩嘅，識彈琴同吹簫嘅佢自然就會喺音樂組插科打諢。
至於我？！哈哈哈，學校強迫初中生一定要搵樣嘢玩，所以…我已經係橋牌學會忠誠嘅連續三年…失蹤會員，同會嘅重有阿康；中一嗰時佢哋嘅招徠賣點就係夠hea，唔會強迫啲會員出席，亦基本上零校外活動，啱晒我。




嗰陣重諗住入去可以玩下鋤大Dee同土改鬥死地主，點知規矩就係唔可以玩橋牌以外嘅紙牌遊戲，包括埋用啤牌疊金字塔都唔得…咁其實，入面差唔多係全男班，唔係宅男就毒撚，有啲眼鏡高form生會當嗰度自修室；聽聞都有掛名女會員，但又係由頭失蹤到尾嗰啲，所以就算有得鋤啤我諗我都無心機去。
不過真係堅hea，個阿Sir本身就夠hea，有時會去答下啲高form數學問題，佢教數同埋M1；而啲幹事都係往年嘅hea仔升上去，正所謂薪火相傳，呢個傳統摺社就成為咗我哋一大班摺友嘅避風塘，唔好睇少一個默默無名嘅橋牌學會，竟然係有三十幾個會員，如果出席晒係可以坐爆個Lab！
順帶一提，由於傷心小棧同橋牌係好相似，所以係可以玩嘅，但呢間學校無聶小倩、白素貞、祝英台，所以算吧啦…