為了實現媽媽遺願，我成為了女兒國唐僧: 363

Q：「喂，聽日星期五，放咗學我叫Vincent攞個欄同粒鉛球出嚟畀你試下嘞，你知你平時PE堂都剩係得過玩字㗎啦。」
其實呢…男仔同女仔就分開上堂嘅，不過有次我同班友討論一個排球最高可以托到幾高，研究一個室內排球場樓底要有幾多米；我從來都係一個深信實踐是檢驗真理的唯一標準嘅小朋友，所以我出盡全力一轟…個波差唔多飛埋出街外馬路，好彩撞圍網彈返入嚟，再飛咗去女仔嗰邊，阿sir當然屌晒鬼咁對住我發狂咆哮，我就即刻衝過去善後，好彩無打到啲女仔；至於嗰堂我當然唔使指擬再有得掂個波，俾佢罰喺中間操場跑圈，等我俾啲女仔笑。
正確啲嚟講係等我有機會可以喺一個近啲嘅距離睇女仔做柔軟體操，嗰陣我都未同QQ坐。
我：「Vincent？邊個嚟㗎。」
Q：「咪你個社長囉。」
我：「乜我個社長喎，從來都唔知個社有乜用。」
Q：「哈，如果無社，你哋班鹹濕佬何來啦啦隊大髀睇？」佢講完我就忍唔住望下佢隻腳。
我：「咁，我唔一定要睇嘅…原來佢叫『瘟神』。」
Q：「你呀，咪咁大聲咁樣嗌佢呀，如果佢知道就嬲死你都似，雖然我哋平時喺後面都係咁嗌佢。」
女人就係咁，喺人前面就女神，喺人後面就八婆，喺我屋企就係一隻剩係識食嘅懶豬。




我：「嘻嘻，點都好啦，妳記得妳嗰三啖就得。」
Q：「得喇，我幾可走你數喎。」
三啖！我就用三啖嚟征服妳，啜到妳出水為止。
幻想總是美好的，上課大多是痛苦的。
鄧：「喂，科長，你重未收功課嘅？啲課後簿呢？」
「呀…呀…Sorry，因為今日有堂，諗住lunch後先收。」呢啲科長真係懶到爆，因為朝早收嘅話就要自己捧落去畀Miss，等到上堂前先收就慳返呢個步驟，而家啲學生實在係一蟹不如一蟹。
鄧：「喂！而家咪上堂囉，咁要你嚟有乜用呀？」
「對唔住，食完飯唔記得咗。」
嗯嗯嗯，炒咗啲無撚用嘅科長就差唔多。
鄧：「唔得閒鬧你住，唔好嘥啲無謂時間，而家所有同學傳功課出嚟先。」




唉，如果唔係Miss Tang妳咁好人，點會縱容到啲科長咁嘅德性，實大錯矣…
乜話？！課後練習簿？乜鬼功課嚟㗎？