為了實現媽媽遺願，我成為了女兒國唐僧: 305

A：「你係第一個抱我唔抽我水嘅男仔。」
我：「哈哈，抽水呢啲嘢，有緣就會抽到㗎喇。」
咁即係點？佛係抽水，有緣嘅話啲水就會自然倒落我身上…Angel姐姐，其實我好想要…只係呢個時候睇落就唔係幾適合；想還想，身體都係識分善與惡，睇到Angel咁我下面都無硬到，咁我又何必要多手呢。
A：「唉…情人節，點解我要喺度同你謦埋啲咁嘅嘢喎，好破壞氣氛。」
我：「唔係幾好咩，睇得出妳好似放鬆咗咁。」
A：「呀，畀啲嘢你睇吖。」
講完佢就除低咗件外套，嗯，有乜睇？想我睇佢嘅曼妙身材？佢身材係唔錯嘅，不過未至於有乜嘢特別值得畀我睇囉。
我：「喂！喂…Angel妳做乜…我…唔係…」
佢背對住我坐，伸手去後面拉高自己件衫，乜嘢意思？想除衫叫我攪佢？我真係會忍唔到聽話㗎…
A：「你唔好諗歪啦，真係畀你睇咋。」




睇…好囉，我乜都睇㗎。
A：「你都應該睇慣女人㗎啦。」
我：「妳都可以咁講嘅…」
佢一路拉，直至見到條粉藍色胸圍背帶，我終於知道佢想畀乜我睇，係一個紋身。
A：「應該會遮住咗，等我解開佢睇得清楚啲。」
我：「唔使啦…咪一樣…」
A：「有乜所謂，我信得過你。」
啪一聲，背扣解開，Angel對我裸露出佢嘅玉背，喺街燈下都睇得出佢嘅肌膚雪白亮麗，比起QQ再瘦少少，無咁多baby fat，但就好有女人味，非常之靚；再加埋條纖腰，我覺得要佢做啤酒妹實在係太大嘥，不過世事就係無咁完美，佢個樣雖然算係好睇但就流於平實，無乜出彩之處。
喺肋骨兩邊嘅背肌係一對紋身，左邊係一枝電結他，結他上面用兩樖草嚟做裝飾，而右邊就係一枝玫瑰花，係盛開畢露嗰隻。
A：「點呀，靚唔靚呀？」




我：「幾好吖，有層次，都幾襯妳。」
講真我對呢啲嘢就無乜興趣嘅，我都幾怪下，就算我最曳嗰陣都唔鍾意對我身體做任何人工嘅嘢，唔鍾意食煙，無諗過要穿環，亦覺得紋身好無聊，又唔係要做黑社會大佬，紋嚟有乜謂？
A：「諗返起嗰陣都幾開心嘅，我都唔會後悔。」
我：「妳真係肯定？」
A：「係嗰陣呀，唔係而家呀，活在當下明唔明？你同妳EX破處嗰陣咪又係亂咁嚟，開唔開心吖？」
我：「係嘅…妳講得啱，想問下，妳紋咁大個範圍係咪會好痛？」
A：「紋大啲唔會痛啲，而係會痛耐啲，咪趴喺度流咗成個鐘眼水囉，好似俾人SM咁。」
我：「妳唔係應該一路㨃草一路紋嘅咩？」