為了實現媽媽遺願，我成為了女兒國唐僧: 303

A：「離開咗班band友，你估下會點？」
我：「我唔知，好難想像，應該會好down。」
A：「係呀，無咗班friend，又無咗精神嘅麻醉，成個人唔知點咁，諗住變返以前咁就算，但發覺原來已經唔可以，學校好多人講我壞話，之前啲女仔friend變得對我好避忌，唔敢行得太埋，而啲仔點諗你應該都估到…」姐姐柔情而哀怨咁望住我。
我：「咪覺得妳喺出面同啲仔亂攪，會覺得妳好cheap，當妳係…雞，但自己又想玩。」
A：「嗯…所以我中五中六呢年幾就好似自閉咁。」
我：「咁你而家畢咗業，算係甩難？」
A：「重點唔係學校點，因為呢樣嘢都可以話係我自己攞嚟，控制唔到，我又唔識點同同學解釋，由於我嗰陣太抑鬱，所以就上網訴下苦水，識啲網友嚟謦下欬咁。」
我：「咁你識到啲乜人呀…」
A：「可能我真係太黑仔，又或者嗰啲band友其實唔係異類，根本成個世界嘅人都係咁，當我以為有人會陪我謦心事做我樹窿嘅時候，原來佢係嚟呃完蝦條就消失，當我諗住有人嚟教我功課嗰陣，其實就想借啲意抽水，睇落係約妳出嚟行山散下心嘅健康男仔，其實最健康就係佢條下體，好啦，有個怕怕醜醜斯斯文文嘅剩係同妳行街食飯睇戲，到有咗少少感情，發生咗幾次關係，先嚟同我say sorry話佢同條女鬧完交和好如初。」
我：「Angel…妳可以say no㗎嘛。」




A：「是但啦，我都戥佢哋可憐，要用埋飲奶啲力嚟諗辦法氹我出嚟，做戲又做到七情上面咁，益下佢哋都好閒…嗰啲嘢…但可唔可以唔好咁對我呀，想屌咪直接講囉，點解係要扮到對我好，然後再狠狠咁傷害我！有時真係覺得做雞都無咁嬲！」
我：「咁又何必呢…浪費啲精力喺無謂人身上…」
A：「我只係想有人惜我！有人可以照顧我！點解都咁難？！」
Angel攞起剩低嘅半枝藍妹想一飲而盡。
我：「唔好飲咁多啦…」
A：「你理得我吖！」
我都唔知點解，即時反應就係搶走咗佢枝藍妹，將嗰640ml嘅三份一枝啤酒咕嚕咕嚕咁吞晒落肚，好彩重凍凍地，加埋飲得好快，都唔知係乜嘢味喇，當係水嚟就得。