為了實現媽媽遺願，我成為了女兒國唐僧: 278

我：「Hello，Angel姐姐！」
A：「好忙呀，唔得閒理你住。」
佢一手一個冰桶喺條通道度行，其實都幾重下，難為佢咁細個就要做埋呢啲粗重嘢；我就話牛高馬大，四肢發達，頭腦…唔講喇，啫！睇住佢做嘢都覺得幾辛苦下，對住啲客又要賣笑，所以我好慶幸馬叔叔佢諗到呢個位塞我入嚟做，最多都係攞啤酒畀嗰幾枱熟客唔使同陌生人打交道。
個場九點幾都重係好爆，我諗啲阿姐今日都好難準時走人，廚房喺度好努力炒埋啲order，佢哋就盡速上埋啲菜佢，而個火鍋區重係喺度打仗咁，好多後生仔繼續奮力作戰誓要塞到個肚爆為止；自從喺度返工之後，我開始對自助火鍋無晒興趣，我諗就算食都係兩三碟牛肉加個麪就算，絕對唔會再食死自己為止。
馬：「阿爽，幫我去雪櫃潷多少少凍料出嚟refill吖，求祈執多幾樖菜出嚟畀啲嘩鬼。」
就係咁，蟹柳，魚蛋，芝士腸，豆腐包，掟死人水餃…牛丸同魚皮餃就唔潷喇，呢啲貴費事幫公司倒米，反正食到呢個鐘數有乜落肚佢哋都唔知。
Angel姐姐就不停圍住幾枱大枱斟酒，都係一大堆男人嚟，聽日年三十係屋企人食團年飯，我諗今日會係嗰啲公司或者社團嘅團年飯掛，總之啲男人個個都紅噹噹咁，好大聲講嘢喺度喪笑，無謂提，可能就嚟有新年假同雙糧所以興奮掛…
A：「呼，攰死人，終於有得抖下。」
我：「辛苦晒妳喇，Angel姐姐。」
A：「喂，都識咗咁耐，唔好叫我姐姐啦。」




嗯？好耐咩，兩日咋嘛，唔想姐姐咪delete返囉。
我：「Angel妳又唔放工住呀？就嚟搭半喇喎。」
A：「唔啦，枝枝都有錢㗎，早嗰一粒半粒走都無乜意義，賺得一蚊得一蚊，你見嗰枱黐線佬起碼重可以飲多半打！」
我：「其實…做啤酒妹係咪好辛苦呀？」
A：「有乜工唔辛苦喎，除非你好叻啦。」
我：「咁…會唔會遇到啲唔愉快嘅事㗎？」
A：「哈，原來你想八呢樣嘢。」
我：「無呀，因為出面啲人，好似會覺得啲唔三唔四嘅女仔先會做啤酒妹咁。」
A：「讀唔成書啫，乜我好唔三唔四咩？」
我：「咁又唔會，聽落睇落都好正常，重好勤力做嘢。」我見佢有時會幫啲女人斟埋茶添。




A：「唔愉快呢，唔多唔少都會有啲啲嘅，不過都好快慣，做酒樓會好啲嘅，大排檔啲客就粗魯啲，但點都好過喺酒吧做嘅。」
我：「大排檔啲客會點㗎？」
A：「咪有時會迫妳陪佢哋飲半杯咁囉，然後嗌一兩打啤酒就以為自己係大豪客，捉妳同佢哋影相留念，係咁意摸下條腰，最多掃下pat pat咁囉，大佬…我哋賣啤酒㗎咋，唔係夜總會賣香檳同XO嗰啲小姐，不過做得呢行都預咗要俾人掂下，好難完全避免，但佢哋唔會太過份嘅，班廚房佬都唔係善男信女，佢哋見到勢色唔對會借啲意上菜或者收嘢過嚟打亂佢哋。」
我：「原來係咁，箇中有咁多學問嘅。」
A：「睇下你吖，個鹹濕樣出晒嚟喇，你個人細鬼大，唔好以為我唔知你喺度諗緊乜喎。」
我：「會唔會有人揭起妳條裙㗎？」
唔知點解我凝住會有呢樣嘢，因為聽過人哋話大陸啲高級食府，所有侍應姐姐條裙都係可以揭起嚟任睇，如果你真係豪客嘅話，當你揭起嘅時候佢哋就會望返住你笑，代表你可以伸埋隻手入去掂…究竟，呢個都市傳說係咪真有其事呢？