為了實現媽媽遺願，我成為了女兒國唐僧: 265

價值不高，係因為我唔算揀飲擇食，單論食，我心態係好又一餐，唔好又一餐，就算之前同細蚊都玩得好開心，比起靚，容易相處同舒服更重要。
話咁快Angel就換完衫出返嚟，放工嘅佢著住一件鬆身嘅白色印花T，貼身嘅牛仔褲，實在係非常之咁普通，普通到我差啲唔認得佢；佢手抽住一個黑色紙袋，我諗入面載住嘅就係佢套返工戰衣。
A：「呀爽唔該晒你喇，咁我走先。」
我：「辛苦晒喇，bye bye Angel姐姐。」
點鬼知佢行咗埋嚟我耳仔邊講嘢。
A：「唔準打啤酒妹飛機知唔知。」
我：「我…無諗過囉。」
A：「係咁先。」然後同我揮手道別。
係喎，唔記得問佢聽日會唔會返工嘅添…不過無所謂啦，有緣就自然會見到，自從我屋企多咗個麻煩嘅皇帝女之後，我好似對出面其他女仔都睇得好開，既來之，則安之。
然之後就繼續處理我嘅工作，準備清理個災場一樣嘅火鍋料自助區，話雖我唔係負責做清潔，但啲醬滴到成張枱都係究竟係乜事？唔通我唔抹咩…




十二點多啲返到屋企，QQ重未瞓，繼續埋首喺佢本單行簿上面，唔知佢係咪真係可以靠寫小說搵到錢呢，喺無乜期望之下又有啲期待佢到底可以寫成點。
Q：「有無嘢食呀？」
我：「有隻硬晒軚嘅糯米雞，妳想而家食？」
Q：「好呀，我都肚餓。」
我：「等一等呀下，妳想做肥豬我實幫妳。」
佢竟然無反擊，睇嚟係完全沉醉喺文字世界度。
到咗第二日，我起身已經係中午，QQ繼續伏案疾書，我就唔去打擾佢喇，首先洗面擦牙，然後再煮午餐；一切如同平時我哋無節目嘅假日一樣，只係我多咗樣嘢諗，就係究竟我今晚返工會唔會見到Angel姐姐呢？
Q：「今日已經年廿八喇…」佢一路食晏一路講。
我：「係呀…但對我嚟講無乜分別。」
Q：「你真係唔使執下間屋㗎？」




我：「執唔執都好似差唔多啫。」
Q：「雖然都係，係喎，話過要幫你洗滑鼠。」
我：「我以為妳已經唔記得咗。」
Q：「點唔記得呀，其實唔係幫你洗，而係幫我洗，大佬，我都要用㗎嘛，我唔想搞到成手都係你啲細胞屍體同發酵蛋白質囉。」
我：「講到咁恐怖，我負責洗返嘞。」
Q：「咁又唔使，我無咁潔癖，呢啲嘢好閒啫。」
我：「咁都係嘅，吞落肚咪又係咁樣…」
Q：「係咪撩架打呀！係嘞，我媽咪約咗我後晚食飯呀。」原來佢媽咪都重記得佢。