為了實現媽媽遺願，我成為了女兒國唐僧: 255

Q：「學過一排囉…咦！做乜咁問？！」
我：「八點打傳說吖嘛…」
Q：「哦，原來你約咗阿健玩…」
我：「無約呀，咁啱喺樓下撞到，同我嗔某位賤女人幾粒鐘都唔覆佢message咋。」
Q：「喂…我唔信佢會咁講囉…係咪你加鹽加…」
我：「呢層，又…唔知…嗚吖嘩嗚啊啊！」
唔使諗喇，今次係面，扭到上下腭反轉咁滯嗰隻。
Q：「睇你以後重敢唔敢，咁佢啱啱開唔開心呀？」
我：「咪好似打工仔同學生哥平日起身見到掛八號風球咁囉，收到message就飛奔咗返屋企。」
Q：「哈哈，簡直係李嘉誠開倉派米咁。」




我：「唉，好心妳就唔好玩佢啦。」
Q：「無玩佢，我只係飾演緊一個好普通嘅女網友。」
我：「佢送畀妳嗰堆skin都幾百蚊啦。」
Q：「唓，我食你一餐都幾百蚊啦。」
唔可以咁計嘅，我都有份食，一人二百幾啦。
我：「咁又點同，我同妳一齊去食嘢係度過咗好開心嘅時間喎。」直頭係幸福到出水嗰隻添啦。
Q：「你又唔係佢，你點知佢唔開心呢？子非健，焉知健之樂？」
我：「吾非水魚，焉知水魚之苦，妳咪試下話畀佢知妳喺Queenie囉。」
水魚…我唔知自己係唔係，剩係知而家幸福到喊…
Q：「唔差呀，有得同學校女神打機都抵吖。」




我：「好難講，條友仔好似唔係太鍾意妳㗎咋。」
Q：「正常吖，學校啲男仔，一係就想追我J我，一唔係就唔多妥我㗎啦，我唔係唔知噃。」
我：「其實妳喺學校都可以nice啲，對人和善啲嘅。」
Q：「我唔需要更加多男仔鍾意我囉。」
我同佢面對面四目交投，氣氛有啲尷尬唔知講乜好；的確佢喺學校想用乜嘢型像見人係佢嘅自由，同佢啲八婆friend一齊就算幾乞人憎都重會有男仔對佢哋獻殷勤，而有仔嘅QQ根本就無呢個需要，況且讀書又可以自給自足；如果佢喺學校好受歡迎對我嚟講都唔係一件好事嚟，只要我同佢喺呢間屋入面…相處得開心就好夠。
Q：「欸…唔講呢個喇，重有幾個folder喎，又係乜嘢model嚟㗎？」都好，謦返啲無謂嘢。
我：「呢個係菊地姬奈，只係大妳少少。」
Q：「嘩！呢個好呀，個type真係好類似，清純嘅妹妹仔青春無敵，身材都非常唔錯，不過…個樣比較有種平凡感，同埋唔太自然。」
清純…呢兩粒字好似唔太適合形容妳喎。
我：「各有各好啦，無人係完美嘅。」




Q：「下一個啦，你部腦真係幾好睇。」
我：「竹內詩乃，係學生制服選美冠軍。」
Q：「靚就唔太靚，但好自然有親和力，鄰家女孩咁嘅feel，呢幾張泳衣同著住校服落水濕身都好正，拍呢啲題材可以令人唔會覺得賣弄性感同突兀，而且，笑容係接近滿分。」
我：「好喇，係咁多，無嘞。」
Q：「重有一個同我即刻打開佢，如果唔係你會永遠搵唔返呢堆folder。」