為了實現媽媽遺願，我成為了女兒國唐僧: 223

我哋就由落船條長堤開始影，用個海做下背景，又反轉用下條大街後面啲屋仔做背景；女神不愧係女神，一影相個樣就唔同晒，笑得鬼死咁甜，又好鬼有活力，畀人一種異常樂觀開朗嘅感覺…
點解異常？因為正面到一個假嘅層次，正常女仔平時邊有咁神采飛揚㗎，嚟南丫島都好似開心到中六合彩咁；影完幾幅佢就會收返埋佢個樣，行嚟我身邊檢查下啲成品，如果乜咗或者對唔到焦就會拍我手臂鬧鬼我。
無錯，IG女神係假㗎！有仔就唔貼出嚟，平時讀書讀到死就唔講，幅幅相都係食同玩，每一刻都係平易近人和藹可親，打扮到靚一靚著到洋娃娃咁…
對我嚟講，喺屋企著住套hea爆睡衣飛住釘，溫書溫到打晒喊露，一路搣自己個肚仔一路扭我計蒸蝦餃畀佢食…呢個先係真正屬於我嘅右女神。
當我哋由條長堤行到上島嗰陣，有個姨姨坐咗喺度，隔籬就戙咗一大塊紙板。
姨：「兩位租唔租渡假屋？即日有平呀。」
基於八掛嘅原因，我行咗埋去望下，都係大概二百呎嘅套房，平日就四百零蚊左右，如果有海景就貴多兩百，其實都幾合理，如果朝早起身可以望到個海好似都幾舒服，唔知睇唔睇到日出呢？諗咗一諗就知唔得，因為榕樹灣向西。
而個姨姨就用啲古靈精怪嘅眼神望住我哋…係嘅，一男一女去離島睇渡假屋十居其九都係為咗扑到天昏地暗㗎啦，唔通會嚟遠足生態遊咩，野外炮戰都重有啲可能；而我同QQ睇落都比起正常中三大少少，我又高啲啲，佢對波又脹啲啲，需要一間渡假屋嚟朝性都係正常不過。
Q：「唔好意思呀！我哋晏啲就搭船走㗎喇。」
姨：「我哋喺大街有間鋪㗎，開到八點，夜啲有需要都可以過嚟搵我哋。」




咁進取嘅…當時鐘租兩粒鐘唔知得唔得呢？
然之後QQ就拉走咗我，姨姨就笑吟吟望住我哋。
Q：「喂！你個死人頭唔係嚟到呢度就諗住同我開房呀？！」
我：「乜呀…無諗衰嘢喎，睇下價錢咋嘛，乜嘢開房喎，我哋一齊住㗎，重有乜房好開…」
Q：「咁咪係囉！我哋都住埋一齊，唔准嘥啲無謂錢呀…平時有乜需要，我都可以幫下你嘅，如果唔係太過份…」
我：「哎呀，做乜重攞呢樣嘢出嚟講，我當咗妳係我重要屋企人嚟㗎喇，點會有非份之想…」
想，唔係無，但絕對唔係非份，我唔要夾硬嚟，一係就要同妳好好愛落去，我唔要俾肉體關係破壞我哋兩個嘅關係，只不過佢有男朋友，嗚嗚…
我：「呢啲咁尷尬嘅話題就唔好攞出嚟討論啦…」
Q：「乜我同你之間重有嘢係尷尬嘅咩？」
我：「其實又真係無乜嘅…」




係囉，尷尬到喺隔籬床聽佢DIY，尷尬到幫佢剃胳肋底毛，然係喺佢身邊望住佢嚟J都試過…
Q：「哦！我知喇，你梗係想睇嚟plan同細蚊去！」