為了實現媽媽遺願，我成為了女兒國唐僧: 220

最後我終於喺個船程表上面䁽到呢架船係去榕樹灣，榕船灣…即係邊度嚟？然後我就跟住QQ上咗去上層坐低，打開咗個地圖app輸入榕樹灣三隻字，就將我彈咗去南丫島，再click啲相嚟睇下，先發覺原來我嚟過呢度…
Q：「嗯，你做乜望住部電話發怐愗呀？」
我：「…」
Q：「唔係我迫你陪我玩唔開心呀？」
我繼續擰擰頭。
Q：「你唔係暈船浪呀…做乜眼濕濕咁？」
我：「我醒返起…五歲嗰陣去過榕樹灣。」
Q：「你掛住媽咪呀？」
我：「嗯嗯。」我扤頭，眼淚已經忍唔住流出嚟…
Q：「嘻，乖仔，過嚟吖。」




QQ打側咗個身嚟坐，兩隻手扶住我膊頭拉我個人埋去佢個身度，直至我塊面貼咗上去佢個軟淋淋嘅心口上面；今日係平日，中午時段無乜人會來往離島，所以架船上面得好少人，上層計埋我哋先得四個，而且我哋坐喺後面，真係空曠到喺度曳曳都無人知。
QQ妳搞乜鬼喎…見我唔開心妳就攬住我嚟氹返我？咁如果我日日都唔開心，咪可以日日攬住妳個身體囉…妳個身好軟綿綿，重好香…唔得㗎，我唔可以諗埋啲咁嘅嘢，明明我啱啱重喺度掛住媽咪；呢度可以話係我同佢最後嚟過嘅地方，去完南丫島之後佢身體狀況就已經急轉直下，過多兩三日就攤喺床上面連起身都有困難，然後叫咗阿婆嚟睇我，舅父送咗佢去醫院，老竇匆忙咁趕返嚟；大約捱咗個零禮拜，然後就沒有然後了，只係我唔知道媽咪點解唔再返屋企。
我攬實咗QQ條腰，多謝妳…放心啦，我唔會對妳有非份之想，但真係好舒服，攬住妳嘅感覺就好似我細個抱住媽咪咁，喺我腦海入面嘅記憶都係呢種大細；而QQ就一路喺度摸我個頭。
Q：「你媽咪見到你咁樣實笑死你呀。」
我：「點解要笑我喎，掛住佢咋嘛。」
Q：「你媽咪佢又堅強，又樂觀，又靚女，笑得咁甜，點會容忍到個仔咁無用…」
我：「吓…妳點會知我媽乜嘢樣…」
我縮開咗個人望住QQ，佢望住我嘅笑容都係好甜美，但係隻眼就都濕咗…係喎，佢睇多咗我二十年我媽咪寫嘅嘢，都唔知入面有乜喺度…
Q：「明知自己生命就完結，都可以寫到啲咁美好嘅嘢出嚟，我實在係好佩服。」
我：「如果妳知自己就…完，咁又會點？」




Q：「無呀…乜都做唔到…如果可以就俾我抱住你啦。」
我同QQ兩個緊緊咁抱埋一齊，唔知過咗幾耐。
我：「妳有無掛住媽咪呀？」
Q：「無喎，唔掛住啲無貢獻嘅女人。」
我：「做乜咁話佢喎。」