為了實現媽媽遺願，我成為了女兒國唐僧: 210

出咗（車立）轉彎，就見到文華廳嘅reception，企咗一位知客姐姐，望落係好企理斯文，紮起咗個頭髮著得好整齊，同出面餐廳嗰啲MK妹或者鄉音阿姐知客有好大分別。喺左手邊就有個等候嘅area，放咗三張好grand嘅梳化喺度，重有個木茶几，總之呢度就乜都好靚啦。
我第一次嚟呢啲地方人生路不熟，當然將所有嘢交畀Queenie處理，我負責食嘢同埋單就好。
知：「你好，請問兩位有位未？」
我諗…佢應該以為我哋嚟搵返啲大人掛。
Q：「未呀，就係我哋兩位。」
知客姐姐露出咗一個奇妙嘅笑容，呢種笑容，絕對係尷尬而不失禮貌，你講唔出有任何問題，但佢帶畀你嘅message就係你呢兩隻小鬼到底嚟搞乜鬼？但你又絕對唔會覺得佢有任何唔恰當嘅地方。
知：「請問有無訂位㗎？」
Q：「無呀…」Queenie無奈咁回答。
知：「如果無訂位，未必可以安排到畀你哋喎。」
唔知點解，聽到佢呢句，我忽然幻想到好似自己無溫書然後大考考衰咗，學校到時就會同我講唔好意思，理科班已經無晒位咁，平靜得嚟又好恐怖，唔知如果係Miss Tang又會點同我講呢？




Q：「唔好意思，如果無位…唔知外賣得唔得呢？」
Queenie個樣有少少尷尬，但睇得出佢對食蝦餃呢件事嘅堅持；如果畀著係我，我一定講句唔好意思話下次訂完位再嚟過，然後急急腳走人就算；呢度雖然係好靚，我諗入面啲嘢食都會好好味，但就令我有一種好不安嘅感覺。
知：「想問下，小姐妳之前有無嚟過㗎？」
Q：「有呀，之前同屋企人嚟過好幾次㗎喇。」
知：「請問有無屋企人之前訂位嘅電話號碼？」
之後Queenie講咗個電話號碼畀知客聽，我諗係佢爹地或者媽咪嘅電話掛。
知：「啊，原來你係K生個女。」
Q：「嗯，係呀，我係佢個女。」
知：「兩位麻煩坐喺度等一等先，呢度有本menu畀你哋睇。」
知客姐姐指示我哋坐喺張靚靚梳化上面，再將一本非常精美嘅重糴糴硬皮menu交到去Queenie手上；嗯…由於小弟都係餐飲業嘅一員，都知道餐牌嘅重要性，每次返工我都會將啲影印出嚟嘅特價點心紙用閘紙機一開為二派搞到成手碳粉，重有要抹乾淨啲油淋淋嘅彩色餐牌，啲俾小朋友玩皺咗嘅就要諗辦法壓平，就算裂咗都可能要用膠紙黐，因為馬叔叔話印呢啲嘢其實好貴。




Q：「呼…好彩啫。」
我：「幸會呀，K生個女，全靠你我先有蝦餃食。」
Q：「咪嘈呀，K生都唔知死咗去邊喇。」
我：「其實你嬲唔嬲佢？」
Q：「嬲又可以點，現實係唔會變，最緊要係佢無事就好，唔好畀啲仇家搵到。」
我：「其實妳會唔會有危險㗎？」
Q：「唔知呀…應該唔會掛。」
對於呢樣嘢，我唔算太擔心，因為知道條爛作者好懶，唔會想寫嗰啲喺月黑風高夜偷偷匿喺貨櫃車，再潛入綁匪大本營間廢棄貨倉，喺槍林彈雨同刀光劍影之下救返QQ出嚟嘅驚險場面…你知啦，QQ咁大食又咁識食，食窮啲綁匪就唔太好，細路女又唔多用得，綁都綁佢媽咪先啦。
當然，如果我無機會救佢死裡逃生，自然就唔會有佢獻身報答我嘅香豔場面，咁就唔會抵觸呢度嘅排行榜規則…即係話，我要考慮下請人返嚟綁架佢再自己救返佢…然後佢就會感動流涕剝光豬。
諗起…都！