為了實現媽媽遺願，我成為了女兒國唐僧: 180

喺屋企胡混完一輪，食埋晚飯之後，星期五晚又到咗我要返工嘅時候嘞；今日嚟到第三日開工，心理上已經好平靜，開始習慣咗呢種生活。
我：「Queenie，我落去做嘢喇。」
Q：「嗯！多謝你搵錢養我。」
我係多麼希望佢會喺後面加老公兩隻字，但諗諗下如果娶佢做老婆成世對住佢我應該會養佢養得好辛苦，真係一條兩難嘅問題。
返到酒樓我已經識自動波著衫開工，一出到大堂我就見到一個熟悉嘅面孔，就係細蚊…同埋佢嘅屋企人，爹地媽咪加埋個唔知讀緊一二年班嘅細佬；而佢亦都見到我，我輕輕咁向佢點咗一下頭，然後就開始做嘢，執枱鋪枱。
細蚊同我住同一條屋邨，一家四口只係靠爹地返工搵錢，阿媽湊完佢就要湊細佬，想打下工幫補家計都實在分身乏術，所以佢哋屋企比起我嚟講係更加緊拙；佢爹地係三行工人嚟，即係做裝修，收入唔係太穩定，可以話係好天搵埋落雨柴嗰隻，平時都好少會有啲不必要消費嘅支出；今日又唔係啲乜嘢特別日子，睇怕一係佢接到單筍job，一係就英皇御准賽馬會出咗糧畀佢，所以先會帶晒成家人出嚟酒樓食晚飯；我望一望佢哋張枱，執咗兩日枱嘅我已經憑望碟已知佢哋食咗乜，一碟片皮鴨，一碟芝士大蝦伊麪，都真係幾豐富；佢哋食得都差唔多七七八八，細佬仔就仍然喺度啄磨緊佢碗伊麪，老竇就喺度睇馬經，阿媽就玩緊電話。
清完三張枱我又可以抖返陣先，我無埋去搵細蚊，費事啦…人哋成家喺晒度尷尷尬尬咁都唔知講乜好，唔通話畀佢老竇老母聽你哋個乖女隻豬已經俾我呢條仆街仔食咗咩。
咁我就企喺廚房出嚟條通道隔籬個魚缸前面等下一枱食客埋單走人。
可能細蚊見我休息緊，就行咗埋嚟搵我。
蚊：「喂！交叉仔…」其實佢都幾可愛嘅。




我：「細蚊…妳咁樣走過嚟同我謦欬，怕唔怕呀？」
蚊：「怕乜，我同阿媽講你係我嘅同學。」
嗯，同學，即係一同學習點做愛嘅人。
我：「哦，細蚊同學妳好。」
蚊：「喂，你做乜喺度開工嘅？」
我：「要搵錢咪要開工囉…」
蚊：「搵錢養女人？」
都無得呃啦，我以前懶到隻嘢咁，老竇又畀夠生活費，如果唔係要養QQ我都諗唔到有乜理由會咁樣一條友出嚟打工。
我：「算係啦…佢屋企人又唔理佢，唔通叫我老竇畀多啲錢我咩，我直頭唔敢同佢講有個女同學住咗嚟我屋企。」
蚊：「呵，真係辛苦晒你喎，羨慕死人喇。」




我：「妳係羨慕我定係羨慕佢呀…」
蚊：「梗係羨慕Queenie啦，羨慕你呢個傻仔做乜喎？」
我：「唔好咁講啦，佢已經好慘㗎喇，以前佢住大屋，有工人照顧佢，物質上要乜有乜…」
蚊：「係咩？但我兩次見佢都覺得佢幾開心喎。」
我：「我諗…苦中作樂掛，每日自怨自艾都唔係辦法㗎，生活都總要過，我都要落嚟打工啦。」
蚊：「喂，交叉仔想唔想同我做愛呀？」