為了實現媽媽遺願，我成為了女兒國唐僧: 174

健：『終於肯online喇咩？以為你棄遊喇。』
我：『無咁易，派完成績表咪玩下囉，難得星期五多咗日假，我都要上星耀喇！』
健：『唉，你就好啦，進步咁多，我無郁過，一陣晏啲Miss Tang上嚟我又要俾阿媽哦。』
我：『咁你都考得唔算差吖，大概全級一半。』
健：『係啫，但佢哋唔會滿足㗎嘛。』
講開又係，係得我老竇先會睇得咁開，化到話如果我讀唔成書就可以跟佢兩父子一齊行船，呢行隨時都好等人用，最好學定一兩門手藝，例如煮嘢食或者維修。
當然，我而家只係想做個無憂無慮嘅中學生。
健：『唔講呢啲喇，我問下Kuromi佢一唔一齊玩先。』
我：『吓？你可以點叫佢？』我扮到黑人問號咁。
健：『嘻嘻，我已經攞到佢FB喇，你等一陣。』




咁我都估到嘅，其實呢個時候Kuromi就坐咗喺我隔籬睇住我同佢chat，一面苦笑咁樣。
我：「睇嚟妳玩得好開心咁喎，Kuromi小姐。」
Q：「放心啦，我熄咗friend list㗎，佢唔會知係我…啲相都應該睇唔出。」
我：「最好係咁啦。」
雖然我覺得阿健佢都係自己摏個頭埋嚟攞嚟衰，但係女神嘅呢種態度呢，都實在係不敢恭維…
等咗陣Kuromi都online埋，我哋就開咗三排喇，聽聞阿康因為成績唔理想俾屋企人禁打機…咁呢個都唔關我事嘅，其實我自己都玩少咗好多就係真嘅，又要溫書做功課，又要返工，家務又做多咗…
健：「Kuromi繼續用愛麗絲啦。」
Q：「吖，好吖～」
就係咁，我理論上第一次聽到Kuromi喺遊戲入面把聲，嬌滴滴咁係幾好聽嘅，相信全世界嘅狗公同埋毒撚都會好受落；咁我都有應兩句嘅，不過就無乜同Kuromi講嘢嘞，一來我唔需要，二來我費事佢以為我想同佢爭；咁佢哋都係講下遊戲入面啲嘢，商量下用乜嘢策略去進攻咁。
打打下我忽發奇想就話自己突然有嘢做要off先，阿健就應該係樂意之至嘅…




Q：「做乜唔繼續玩呀，先玩咗三場。」
我：「無呀，想抖下，睇下妳同佢繼續玩咋嘛，反正連贏三場我已經賺晒，唔想輸返落去。」
呢個時候我係鑽一，重差兩場就可以升星耀，感覺上再玩落去系統就會迫我輸，罰事累佢哋啦，另外就真係想睇下得返佢兩個喺度玩嗰陣會點，阿健又會同佢講啲乜廢話。