為了實現媽媽遺願，我成為了女兒國唐僧: 172

派成績表日重有另一個不成文活動就係睇下隔籬位考成點…當然，我都好想知自己同女神嘅差距究竟有幾大，雖然自知配唔上佢。
QQ見我䚎下䚎下咁亦都好大方推咗張成績表嚟畀我睇，總平均分多我足足十四分，有成八十三分咁多，總排名係廿幾，雖然唔算係學霸嘅級別，但已經足夠守住女神呢個招牌；重有就係要睇下佢呢隻無用豬家政攞幾多分，五十七…真係啱啱好唔合格。
Q：「少咗兩分…唔見咗七八名…」
QQ一面無嚟心機咁，唔知佢係咪因為屋企嘅鉅變而對佢產生影響呢，畢竟佢而家無得去補習，而且日日對住我無人看實佢可能佢都會溫少咗書；對於佢嘅退步，我當然會同佢一齊表現得唔開心，但另一方面，又會因為我哋嘅距離收窄而感到慶幸；如果佢真係考到全級第一我都唔知點同佢溝通好，呢種伸手不可觸及嘅感覺係會令人好無力。
我：「下年無家政，妳會進步返㗎喇…」
Q：「你真係睇通睇透，不過家政佔半科㗎咋。」
我：「唔使灰心，我哋之後繼續一齊畀心機。」
Q：「你多咗七分梗係咁講，可唔可以借兩分嚟呀？」
我：「如果可以嘅話畀晒妳又點話。」
咁應該差唔多考第一。




雖然無關痛癢，都報下其他人攞幾多分啦；阿康低我一分，阿健高我兩分，細龜高我七分…頂，原來死宅男日日唔出聲剩係迷偶像組合玩課金抽女女卡game都可以咁讀得書，呢個究竟乜世界嚟？而Yvonne就小息走過嚟同Queenie吹八婆欬之際俾我聽到佢高Queenie半分…希望QQ唔會將啲怨氣發落我身上啦。
成積表就派完喇，不過重有後續嘅，就係見家長；由於今次係揀科前嘅最後一次見家長，所以校方係比較重視會以家訪嘅形式進行，聽日星期五特別放一日假畀啲先生處理家訪嘅事宜，呢個星期五六日Miss Tang應該會忙到抖唔到氣；當然有啲家長係會拒絕家訪嘅，咁就另行約返學校見面，或者視像會議，呢個年代係好先進。
當然我呢啲被獨留在家嘅兒童係會一早就得到特別照顧，Miss Tang早就約咗我老竇唔知幾時做視像會議，我諗係聽晚掛，因為要就返佢工作時間同埋時差；反正我當唔關我事㗎喇，成績好咗我已經叫安全上壘，其他嘅嘢我一於少理。
係喎，咁…Queenie媽咪會點呢？應該家訪唔到㗎啦，無理由借嗰位哥哥間屋嚟做家訪㗎…