thriXt Qantasy 純文字安眠之作 (New: - U2K - 一直上架): 149

我：「馬叔叔，佢哋話要四枝藍妹。」
馬：「你去攞佢哋個冰桶過嚟。」
於是我就行返去攞個冰桶過嚟，喺馬叔叔指示下抽起啲吉樽，泌走啲水，加返半殼碎冰落去。
馬：「你知唔知邊枝係藍妹？」
於是我就指住嗰隻藍色嘅妹妹仔。
馬：「咁其他幾枝你識唔識？」
我：「有個大概咁啦…」
然後馬叔叔逐枝逐枝介紹畀我識。
馬：「呢枝獅威，好難飲！百威，唔好飲！嘉士伯，醇滑無味！青島，怪味花香！藍妹，清爽…」
我：「咁邊枝最好飲呀？」我多口一問。




然後佢好無奈咁指住上格罐可樂，證明女神真係全世界最識飲嘅女仔嚟…
插咗四枝藍妹入個冰桶之後，馬叔叔又教我㩒機加返四枝藍妹落佢哋張枱，由於只係得返一張枱就得佢哋嗰張著咗紅色唔使記號碼，然後印咗張新單出嚟叫我夾落佢哋塊落單板上面同攞埋個桶過去。
我：「佢哋嘢都食晒齋飲唔悶㗎咩？」
馬：「佢哋唔好意思要我哋白加班咪買酒飲囉。」
完來係咁…跟住我就秤起嗰個都幾重嘅冰桶行過去，小心翼翼咁抬上佢哋個枱面。
「喂！小兄弟，做乜咁細個就出嚟做嘢嘅？」
我：「無呀…出嚟，學下嘢咁。」
「咁勤力？唔似喎，係咪唔夠零用錢使？」
我：「又唔係嘅…」
「重唔認？係咪要儲錢買四驅車？快啲講！」




我：「唔係買四驅車…」
「老馮你咪嚇親細路啦，而家重邊有人玩四驅車㗎？係咪老竇顧住賭錢唔畀零用錢你？」
我：「又唔係嘅…」
「記住唔好賭錢呀！無得贏㗎…」
「咁你枱面嗰張飛係乜嚟？！」
「呢個…贏咗呀仔咪有得去補習囉！」
「哥仔記住千祈唔好學佢呀，要好好讀書知唔知！」
「哎呀，你哋唔好阻住人哋開工啦，你去做嘢唔好理佢兩個喇。」
我：「嗯…幾位叔叔飲得開心啲喇…」
唔通…無端端我變咗做啤酒仔？




到咗十二點鐘，呢場沉悶嘅球賽以零比零結束，而我執埋佢哋張枱之後都終於有得收工走人。
返到屋企，QQ啱啱沖完涼坐咗喺梳化上面。
我：「嗯，好夜喇，做乜重唔瞓嘅？」
Q：「等埋你先吖嘛。」
我：「妳又唔係同我一齊瞓，等我做乜啫。」
Q：「哼，唔理你呀！我上床喇。」
我：「聽朝早啲起身，唔好搞到我無時間擦牙。」
Q：「你準備定帶埋牙擦返學啦！」
QQ上咗床，呢個時候我終於可以…嘻嘻嘻！