為了實現媽媽遺願，我成為了女兒國唐僧: 144

我：「好夜喇，快啲沖涼啦。」
其實每晚我都會讓佢沖涼先，一來通常我會夜過佢瞓少少，二來由於佢要搞好耐，朝早一定會早過我起身執靚個樣，好自然我就會俾佢搞掂先。
Q：「你沖先啦，返完工咁辛苦。」
吓，辛苦？或者對佢嚟講都算辛苦嘅…我啱啱做咗兩粒幾鐘咋喎，都係啲落手落腳做嘅嘢，又唔使對人，好過企喺M記個counter前面五六粒鐘俾啲客輪姦啦…雖然啲廚餘係有少少惡頂，嗰啲差唔多煲乾水嘅沙嗲烏冬蓉湯底呢，不過還好我唔算係有潔癖。
我：「咁好啦，等我快啲沖完到妳。」
一路沖我就一路諗，原來自己係有能力可以照顧其他人，重要係右女神，呢種心情超越咗開心，係非常之滿足；睇到QQ對我感激嘅樣呢，我有啲沾沾自喜，但另一方面，睇怕我唔可以喺佢身上攞到啲乜，覺得自己好似好傻咁…
無論如何，佢生活過得好就好。
一月天氣好鬼凍，個熱水爐五分鐘多啲就打柴，都唔輪到我想沖幾耐，所以好快就出返嚟。
出嚟見到QQ睡眼惺忪咁攤喺張床上面，睇嚟佢好攰，而且又啱啱喊完…個熱水爐要等十五分鐘先再有熱水，見到咁我索性熄埋燈，幫佢冚好張被，QQ瞓覺個樣係最溫馴，最乖，甜甜地，好可愛。
唔知我有無機會可以照顧妳一世呢？




到妳有能力照顧自己嘅時候，應該都唔會再留喺度嚕掛…
傻妹QQ，懶瞓豬小心俾啲芒果布甸蛀牙呀，下次唔準咁㗎喇；同埋佢唔洗沖涼都得啦，靚女永遠都係咁香噴噴。
然後就我都瞓埋嘞。
星期日，今日QQ唔使拍拖，其實我覺得並唔係佢條仔忙到唔得閒同佢拍拖，又或者唔想成日見到佢，而係係咁同佢拍拖真係會燒好多錢…當然性需要都係另一個重要嘅factor…
放假，佢都係會做功課，彈下琴，睇下書咁。
突然無端端佢走咗上張床上面做sit up。
我有啲百思不得其解，唔明佢做乜突然會有呢個舉動，作為只係同居同學嘅我本來就唔應該干涉佢嘅生活，喺呢個有限空間入面佢係擁有絕對嘅自由嘅…除咗除我條褲打我pat pat迫我溫書之外；不過唔理佢又好似怪怪哋，加上我又有啲八掛。
我：「做乜無端端做sit up嘅？」
Q：「我覺得我應該要做下運動。」
我：「哈，咁突然？條仔嫌妳肥！？」




我從來都唔覺得QQ肥，不過確實佢係有啲肉地，加少少baby fat。
Q：「佢邊敢呀！未死過呀？」
我：「咁妳突然有呢個感悟嘅？」
Q：「我以前喺屋企…每個禮拜都有兩三日落會所做gym，嚟咗你度都無郁過。」
哦，原來女神都係要用心努力打造出嚟嘅。
我：「咁妳唔出去跑下步？」
Q：「出面好凍。」
我：「趁有太陽出去囉。」
Q：「我唔曬得。」
我：「咁夏天夜晚跑囉。」




Q：「好多蚊㗎。」
我差啲唔記得佢係喺溫室下面做gym嘅女神。
Q：「同埋我喺呢附近跑好易撞到同學。」

無端端廢噏咗十四萬，又嚟賣下廣告。
https://www.shikoto.com/articles/10938.html
女筆女一身好文，貼地直率，極其啱想瞭解異性嘅小男孩睇；唔講廢話，信我就去睇。