為了實現媽媽遺願，我成為了女兒國唐僧: 141

我：「喂，天氣凍冰冰妳做乜落嚟嘅？」
我即刻彈咗去佢面前問佢。
Q：「嗯…」佢企咗起身但無嘢講。
我：「Queenie，妳係嚟接我？」
Q：「嗯…」佢輕輕點一點頭。
我：「做乜唔瞓先喎？我以前都慣咗半夜三更喺條街遊離浪蕩㗎啦，邊使人接㗎喎，我會擔心妳㗎…」我摸摸佢個頭。
Q：「交叉仔…」點知佢即刻變到兩眼濕濕咁。
我：「做乜呀？唔係屋企發生咗啲乜事呀？」
Q：「嗯…」佢左右擰擰頭。
我：「唔通有小強入咗去趕走咗妳？呢個我都驚㗎喎…」拜託千祈唔好發生啲咁恐怖嘅嘢。




Q：「嗚嗚嗚嗚！」
點知QQ突然抱住咗我喺我心口入面喊，我完全唔知發生乜事，明明今日係應該好開心㗎嘛…由於我唔想馬叔叔出嚟見到我唔知喺度做乜，所以我就用力將QQ佢成個人抱起，勉強走到去一個大花槽後面。原來…QQ都重過細蚊一截，加埋佢件褸滑捋捋好難捉實，所以迫到我要好大力同用手捉實佢屁股。
我：「無事嘛，點解好似好慘咁…」
唔通同條仔鬧架分手？！咁…對我嚟講係好事嚟喎，雖然我唔認為佢單身就會對我有意思，但我起碼可以flirt下佢，揩下油，罪惡感都無咁大吖嘛，可能佢悶起上嚟重會同我玩下，嘻嘻。
我：「QQ，無事㗎。」
雖然我唔知佢喊乜，但有咗以往嘅經驗我都知要攬實佢個人收埋佢個頭喺心口，再摸摸佢頭同條頸；QQ啲頭髮係烏黑亮麗，好企身順滑好似絲一般咁樣，有少女嘅香氣，只有而家我先可以明正言順咁摸下佢，不停用虎口位圈住佢啲頭髮嚟捋…
唔通…係佢媽咪出咗事！？因為生活迫人，可能又受到男人粗暴嘅對待，搞到佢一時睇唔開…千祈唔好呀…我細個嗰陣乜都唔識都只係識無咗媽咪好唔開心…如果而家…QQ佢…
Q：「對唔住！要你照顧我呢個無用嘅女人！」
呀…就係咁？傻豬嚟㗎…
妳咁靚女又可愛，我點捨得要妳受苦喎，點捨得妳要獻身畀魔王阿道弗斯，所以我一定會照顧你嘅，我諗每一個男仔都會心甘情願咁做，就好似個傻仔健會不停送skin畀妳咁。




一個男仔，遇到一個女神無傻到嘅話，唔係代表佢聰明，而係代表佢有病咋。
我：「喊包？QQ豬？」
見佢喊到停咗，我就用手抱住佢塊面，順便抽水捽下佢塊又白又圓嘅面珠墩。
我：「傻瓜嚟㗎，話咗要養妳㗎嘛…唔係呃妳㗎！」
Q：「我只係唔知…你會做到去呢個地步…」
我：「妳估我銀行啲錢真係㩒極都重有咩，如果我唔返工又邊會繼續有錢喎。」
Q：「但我憑乜…要你為咗我…」