thriXt Qantasy 純文字安眠之作 (New: - U2K - 一直上架): 138

Q：「你要…開工？」佢個樣好似以為聽錯咗咁。
我：「係呀，要去搵錢呀，今晚就開始！」
Q：「你十五歲咋喎，可以做乜呀…」
我：「樓下酒樓呀，咁啱嗰度有我老竇嘅老朋友喺度，佢好好人肯請我。」
Q：「你講真㗎？」
我：「點會搵呢啲嘢嚟玩喎？嚟吖，QQ，今晚我同妳落街食好啲慶祝下啦。」
Q：「吓…我啱啱先喺出面食完嘢咋喎。」
我：「唔緊要啦，妳鍾意食乜都得㗎！」
Q：「你糧都未出咁興奮做乜呀！」
我：「係…又係嘅…」點解我見唔到預期中QQ嗰個興奮嘅樣嘅…




Q：「乖啦，有雞翼，簡簡單單煮啲嘢就得啦，我又唔係好肚餓…你今晚，畀心機呀…」
我：「嗯，放心啦，我未學識講嘢個叔叔就同我玩㗎喇，佢應該會睇住我嘅。」
喺QQ嘅勸導之下，我都係簡簡單單煮咗兩個烏冬同菜，煎咗兩隻蛋，加埋佢盒打包就又一餐。
食完飯我開始煩惱要著乜衫落去開工，望住我堆亂七八糟嘅衣物喺度頭痛。
Q：「你喺度煩緊乜呀？」
我：「我諗緊使唔使著皮鞋落去。」
Q：「Uncle有無講低呀？」
我：「無呀，乜都無講，剩係叫我九點半落到去…」
Q：「你係做乜㗎，點解咁夜開工嘅？」
我：「我落去清場囉，執埋啲手尾等聽朝可以開檔。」




Q：「如果唔使對客嘅話唔使著皮鞋啦。」
我：「如果我落手落腳做嘢係咪短袖衫好啲？」
Q：「長袖衫都可以摺嘅啫，但唔好太厚囉，同埋搵件唔怕污糟嘅衫咁。」
最後都係是是但但著得斯文啲唔太張揚就算，既然叔叔無講低，即係應該無乜要求㗎啦。
我：「咁我落去喇。」我推開閘。
Q：「等等，我送埋你落去啦。」QQ披件褸上身。
我：「喺樓下咋喎，有乜好送呀？」
Q：「你理得我吖！行得喇。」
QQ唔知做乜有啲怪怪哋咁，明明應該好開心㗎嘛，搵到錢之後就唔使擔心咁快燒光我戶口啲錢，佢咁嘅樣都搞到我唔知點好咁。
行咗兩分鐘就已經喺酒樓門口，呢個時候已經有唔少食客離開緊，有啲重飲到面紅紅咁喺度大大聲聲講嘢爆晒粗，佢隔籬個老婆就尷尷尬尬扯住佢叫佢快啲走…我都知酒樓係成日有啲麻煩客㗎喇，希望唔會影響到我工作啦。




Q：「交叉仔…你今晚幾點放工呀？」
我：「好彩嘅話應該十二點前走得。」
Q：「嗯…你要小心啲做嘢，唔好激親人呀…」
我：「放心啦，我會畀心機，QQ妳唔使等我㗎喇，眼瞓你就瞓先啦！」
就係咁，我同QQ道別完之後準時九點半入到去酒樓，開始咗我人生第一日嘅工作。