為了實現媽媽遺願，我成為了女兒國唐僧: 125

Q：「多謝你呀，我要做功課喇，媽咪會鬧。」
健：「Kuromi…可唔可以add妳Facebook，IG，WhatsApp，Line嗰啲遲啲搵妳一齊玩呀。」
使唔使俾埋個九龍郵政信箱700乜乜號你呀！
Q：「唔得呀…媽咪話唔可以亂咁add啲網友㗎，你見到我online就再邀我玩啦。」
健：「咁好啦，下次見。」
Q：「Bye bye～」
然後終於quit咗game。
Q：「喂！你咁樣望住我係乜意思呀！」
我：「右女神，大騙子…女魔頭…」
Q：「一個skin咋嘛，你使唔使咁睇我呀？」




我：「點呀，妳係咪好想同阿健一路玩傳說落去呀？」
Q：「哦，原來有人唔抵得Kuromi俾好朋友搶走，然後喺度扭計唔開心。」
我：「唓，區區一個女網友，做乜要咁上心呀？」
Q：「你唔抵得咪下次主動啲，同阿健一齊競爭Kuromi囉。」
我：「我先唔會呀，妳個真人就喺我隔籬，做乜我要做埋啲咁嘅無聊嘢。」
Q：「哦，你唔同佢爭，佢睇怕嚟緊我有大把skin收都似。」
我：「女騙子，唔得閒理妳呀。」
Q：「係咩，可能我都係喺度呃緊你㗎咋。」
我：「吓，講真㗎，妳呃我乜呀…」
Q：「呃你養我囉。」




我：「咁樣點同喎，妳真係有困難。」
Q：「講到尾你咪又係心甘情願奉獻畀女神，如果唔想俾女騙子呃就快啲趕我走喇。」
我：「咁樣點得喎…」
Q：「如果唔得嘅話，你差唔多係時候準備晚餐喇，嘻嘻，女魔頭等緊你養㗎。」
我一路洗菜一路喺度諗，其實我都係喺度自欺欺人，QQ有一個穩定嘅男朋友，就算將來散咗佢都可以好容易搵到個光鮮嘅男朋友，我哋本身就係唔同世界嘅人嚟，我係唔會有機會，而且我根本就無能力可以照顧佢。我放佢喺度都只係一個泡影，終於有一日係會爆…只不過我好鍾意同佢一齊生活，好想望到佢開開心心，好想佢喺度可以忘記晒啲唔開心嘅嘢。
阿健，我課畀女神嘅又點止一個skin吖，你以後都係多多進貢吧啦，我哋都係逃唔過呢個命運㗎喇，女神真係毒藥嚟，有一就有再…
只不過你乜都唔知又真係慘咗啲嘅，嘻嘻。