thriXt Qantasy 純文字安眠之作 (New: - U2K - 一直上架): nōnāgintā quīnque

蚊：「咁你走啦，好唔好？」細蚊拂開佢隻手。
「你乜水呀？我哋嘅事關你乜撚事呀？」
問得好，我都想知關我乜事，我都想走，但睇到你而家成副大爺樣，我終於明細蚊點解叫我嚟。我望下佢，感覺好似大我一兩年咁，都幾高大，只係矮我兩三cm，望落都有啲肉，但我覺得佢個人婄婄（pau）地，如果打起上嚟我贏面大啲。我唔想打架，不過出得嚟行，都要做好最壞打算，君子不立危牆之下…
咁佢衣著呢…咪又係街童咁囉，啲頭髮鬼死咁長，加埋有啲紫紅色highlight，我諗佢都係思覺失調會性幻想自己係八神庵嗰啲friend嚟。
我：「Sorry呀…我朋友話有啲擔心，咪過嚟陪佢放學囉，我唔係嚟多管閒事嘅…」
我目標都係送細蚊返屋企嘅啫，實在唔想刺激眼前呢個低能仔。
「哦，我認得你！你係佢EX，俾佢飛咗嗰條柒頭契弟。」佢一路囂張跋扈咁講一路手指指我塊面。
我：「點都好啦，我送完佢返屋企就走㗎喇。」
唔係打架會俾差佬拉嘅話我諗我已經開咗佢拖。
「細蚊，妳搵條咁嘅木嘴嚟落我面，乜意思先？」




蚊：「無咁嘅意思，我只係怕咗你。」
「唔好嬲我啦，我哋好好謦下，好唔好？」
蚊：「我諗我哋之間無乜好謦。」
「妳話考試想靜下，我都無煩妳啦，而家一考完試就話要同我分手，係咪唔啱規矩先？」
蚊：「我想同你分手好耐。」
「唔好咁啦，嚟啦，我請妳食晏吖，唔好唔開心，有乜事慢慢講啦。」
細蚊望住我一副求助嘅樣，我不置可否咁望住佢，我又唔係嚟爭女嘅，唔會要你哋點點點㗎喎。
「行啦，食飽先再講啦。」細蚊猶䂊間佢捉住細蚊隻手腕拖住佢行，無可奈何我唯有跟住。
細蚊有求於我，咁除非佢release我，如果唔係我都會喺佢身邊睇住佢，雖然唔想介入佢哋嘅事。
「你條跟尾狗好撚煩呀！學乜人做架樑呀？」




我：「唔使理我，我只係喺度確保佢嘅安全。」
「我條女喺我隔籬點會唔安全呀？仆街！」
我都懶得理佢，跟住嚟到一間屋邨傳統快餐店，即係有hea爆鐵板雜扒餐，同炸雞髀會蕃茄意嗰啲。