為了實現媽媽遺願，我成為了女兒國唐僧: 八十四

然後我就聽到雀仔嗯嗯奀奀嘅叫聲，清脆悅耳，伴隨清溪流水淙淙，微風呼嘯噴出，好一幅醉人美景，車水穿插，馬騰龍飛，寫意快然。
其實劉蓉呢篇習慣說，係教曉我哋一開始嘅重要性，因為人性係習慣成自然，一開始有個水氹，踩落去你會覺得唔自然，但踩下踩下就會慣咗，繼而鍾意踩水氹，變成喺平地度就會唔安樂，每次見到水氹就會一腳踩落去，彈到水花四濺滿腳泥濘先開心，從而獲得快感；然後曾經滄海難為水，共赴巫山一嚿雲…
我真係諗唔到QQ第一日嚟嗰陣我同佢都重係怕怕醜醜，到咗今日佢竟然喺我嘅三米之遙進行…
都正常嘅，隔住個電話筒，男女朋友自然會謦到㷫熻熻，一時血壓上升總要搵方法釋放返出嚟；係囉，喺愛沙尼亞凍咗成個禮拜，返到香港就梗係要搵返片刻嘅溫柔暖意。
劉蓉公公，放心啦，我會畀心機學習踩水氹，呀唔係…係讀書先啱。
過咗廿分鐘，變返風平浪靜，餘下緩緩嘆息聲。
再過五分鐘，QQ起床行咗落嚟。
Q：「點呀…無不滿呀？」
佢無著長褲，得返條底底喺度，我當然唔好意思望係乜狀態，專心睇住本中文書；明明佢男友係應該嚟打救我等我有得抖下㗎嘛，點知溫得更專心…
我：「無呀，唔關我事，乜都唔知。」




Q：「哈，扭計添呀，唔理你，我沖下先。」
唔知點解，明明Queenie喺隔籬慾火焚身，但我就唔係覺得興奮，反而有啲失落，提不起勁。
Q：「嘩！無嘢呀，你竟然重喺度溫緊中文，我唔係眼花呀？」QQ沖完身出返嚟，換咗條新底褲。
即係我聽日又要幫佢洗條一塌糊塗嘅底…
我：「唔溫書，重有乜可以做呀？」
Q：「忍唔住咪去解決囉。」
我：「無心情喎。」
Q：「咁神奇？唔通你溫書溫到上咗腦？」
我：「無囉，妳同男朋友玩phone乜嘢…關我乜事喎，點解我要有反應。」
Q：「吓，你唔係呷醋呀？」




佢坐咗落我張床度同我講嘢。
我：「黐…黐線㗎咩！呷乜鬼醋，我做乜要呷醋！」
Q：「我有仔你唔抵得囉。」
我：「唓，有仔好叻咩，我夠可以有女咯，只不過…而家無咋嘛！」
Q：「嘻嘻，嗰日細蚊上嚟我咪又要睇住你哋。」
我：「咁點同，我同佢…都唔係…」
Q：「如果佢分手搵返你嘅話，你想唔想返撻？」
我：「吓，點會喎…我諗…應該唔會。」
Q：「做乜呀，嬲人畀帽你戴？」
我：「咁又唔係嘅，換畫好正常，唔好呃住我…同人乜嘢完又走嚟搵我就得。」




Q：「咁係點呀，你而家嫌棄佢？」
我：「唔係…總之…感覺唔同咗啦。」
Q：「唔理你，我都攰，上床瞓覺先，早抖。」
我邊有資格嫌棄人吖，但係日日對住個咁正嘅女仔，有時會喺度諗，為咗有女朋友可以拍拖同上床，所以就求祈搵一個女仔放喺自己身邊係咪真係好…雖然好女仔通常都伸手不可及。