為了實現媽媽遺願，我成為了女兒國唐僧: ο’

我：「係呢，你阿媽真係無搵過妳㗎？」
Q：「又未至於嘅，都係問我係咪正常返學咁啫。」
我：「佢知唔知妳嚟咗我度住？」
Q：「唓，你咪只係一個叫做『你』嘅人嚟囉，我有話佢知唔喺舅父度住，去咗一個有錢嘅女同學度寄宿住先囉。」
我：「其實妳都唔一定要講大話嘅…」
我覺得佢媽咪係一個好開放嘅女人，就算知都唔會有啲乜嘅，況且我乜壞事都無做過係敢光明正大話畀佢阿媽知；反而佢真係要呃住男朋友，如果唔係俾佢知道我呢條粉腸同佢條女一齊住，佢應該會即刻由愛沙尼亞飛返嚟打死我。
Q：「費事佢擔心啫，知我無錢佢又會煩，知我同男仔住又唔知佢會諗埋啲乜。」
我：「對唔住呀。」
Q：「傻啦，邊關你事吖，你已經對我好好，同埋同你一齊住其實都…幾開心嘅。」
我：「開心？但明明妳以前係…」




Q：「唔係咁計嘅，喺度都有啲新嘅體驗，知道咗啲唔同嘅嘢，幾充實吖。」
我：「如過妳過得開心，就實在太好。」
Q：「喂喂，交叉仔…」
我：「做乜呀，QQ？」
佢挨喺我膊頭，用一個好窄嘅角度斜望上嚟住我，我哋兩個嘅嘴唇只係相距幾cm到，換轉係我以前嘅EX2，3，4都已經嘴咗落去車，不過就係QQ畀到一個唔同嘅感覺我，雖然黐到好埋好親近，我都唔會想用啲粗魯嘅方法嚟得到佢，因為我知道係唔會成功，只會傷害到佢。
Q：「我可唔可以睇返你媽咪之前畀你嘅信呀？」
我：「無話唔得…嘅，又唔係乜秘密嚟，但點解…」
Q：「我想感受下囉，同埋想更加認識你。」
我：「咁…妳睇啦，我去打下機，妳自己感受下。」
以前啲信我好多都睇到識背咁滯，同埋喺佢隔籬一齊睇有啲唔知點咁，所以我就由得佢自己睇。




點知…佢真係睇咗好耐，好似喺度溫書，當咗我媽啲信係讀本課文咁細閱，時不時重要喺度笑；媽咪，我諗妳唔會介意㗎可，呢個女仔一定可以比我更加好咁理解妳嘅文字同心思，妳最尾寫咗咁多封信出嚟一定花咗妳好多嘅精神，多一個人睇到妳啲字，咁都無咁大嘥，老竇又死都唔肯睇妳寫畀我嘅信…
既然佢喺度睇我就沖涼先，沖完出返嚟佢重睇緊，我又繼續攤喺床度打機，過咗陣之後Queenie爬咗上嚟我張床度。
Q：「我…有個不情之請…」
我：「我唔做鴨㗎。」
其實我都係㞗噏，佢點會叫我做埋呢啲嘢吖，就算係…我都會聽話嘅，唔太過份嘅話；就好似當年…其實都係今年年頭，Carmen姐姐話要訓練我條脷咁，無論係品酒師定係品蠔師，味覺都係非常非常之咁重要，無辦法啦，要學識令自己高尚。
Q：「我…可唔可以睇埋你將來嘅信？」