為了實現媽媽遺願，我成為了女兒國唐僧: Sn，Tin，鍚，電路銲接，～0.05usd/g

亂嚟五萬字，多謝支持。

最衰細蚊有仔，如果唔係分咗手我都可以求下佢，落嚟樓下畀我攬下同幫下我…
點解要畀帽我戴喎，我對佢都唔係好差啫，雖然都唔可以話好…算！唔好再諗無謂嘢。
等我睇下個雪櫃先…妖！做乜連鳳爪排骨飯都可以賣晒㗎，唔通連個天都要玩我？唯有畀多幾蚊食意粉啦，最大問題係意粉無嘢飲跟，又要我買多枝茶，早知帶埋水落嚟。
叮完就可以開餐，Queenie一直就企喺我隔籬黐到實一實，都開心嘅，就算唔係女朋友，聖誕都叫做有個女仔陪下，而且重好靚女。
Q：「咦，盒粉都幾靚仔喎，有啲真嘅芝士。」
我：「無就死啦，廿幾蚊㗎盒嘢，時代會進步㗎嘛，妳估重係小學雞嗰陣，得七仔嗰個乜鬼…拿破崙意粉，有個濕鳩白色袋包住啲汁…」
Q：「呀！我知你講乜，嗰個食過真係超難食！」
我：「係囉…估唔到佢而家重敢繼續攞出嚟賣…」




而我亦都估唔到Queenie竟然會食過。
一路食，我就好順手咁執咗本game書放喺隔籬睇，通常呢啲game書重有水著女優或者cosplay女女睇下，攞嚟送飯實在係ichiban。
Q：「你平時就係咁樣成日夜晚落嚟蒲？」
我：「一時時啦，好多時係玩完過嚟hea下先返屋企，或者瞓唔著咪落嚟囉。」
Q：「自由自在都幾好吖。」
我：「妳而家都完全自由㗎，我唔會管妳。」
Q：「呢啲自由對我嚟講好似用途不大…」
我：「睇情況啦，有啲女仔放學就要返屋企，咪好難同男朋友拍拖囉。」
Q：「咁我屋企又未有咁極端，佢哋都好似唔想管我會唔會拍拖，只要我講定先都可以食埋晚飯先返屋企。」
我：「所以咪未夠十六歲就失身囉。」




Q：「唔好講啲無謂嘢，食你嘅意粉啦！」
Queenie見我喺度打書釘，佢都有樣學樣攞咗本雜誌嚟睇，係講日系fashion同化妝品嗰啲；講真對我哋呢啲無乜錢嘅小朋友嚟講，廿四M記同便利店都係好重要嘅嘢嚟，有冷氣，有書睇，有凳坐，有唔貴嘅嘢食，有免費水，重有廁紙拎。
我：「係呢，今日有無聖誕禮物收呀？」
唔會無掛，如果聖誕男朋友都唔識做，我真係驚佢會俾Queenie修理到愛沙尼亞都唔使去。
Q：「嗱。」佢揚一揚隻左手。
係一條銀鍊加兩粒玻璃珠。
我：「都幾靚嘅。」其實我唔多識欣賞。
Q：「嗯，咁就成千蚊㗎喇。」
我：「都幾大禮喎。」一個一千，收多幾隻兵咪…
Q：「未夠你盒LEGO咁大。」




我：「咁妳送咗乜畀佢呀？」
Q：「唔話妳知，自己估啦。」
呢排女神無錢，估計都唔會係啲乜值錢嘢，不過女朋友嘅嘢，得香吻一個你都要收㗎啦。