thriXt Qantasy 純文字安眠之作 (New: - U2K - 一直上架): 100001

我：「無呀！妳咪小人之心度君子之腹。」
Q：「係咩，肯定你做咗都唔敢認囉。」
我：「鍾意點諗係妳嘅事，總之我一見到就掉咗落洗衣機…呀，係嘞，妳條校裙都要洗。」
慳錢呀，一機洗到幾多就得幾多。
Q：「哦。」
點鬼知Queenie佢直接喺我面前拉開條背脊鍊，過頭笠咁成條校裙除咗出嚟。
我：「喂喂喂！妳又係咁樣！」
Q：「唓，又唔係未見過，睇一次同睇一千次都係一樣㗎啦。」又真係好有道理喎。
但佢嘅body真係好吸引，我一路炒麪都忍唔住望多兩下；嗱，唔係想非禮佢呀，當欣賞藝術品咋。
最頂癮係佢喺廳攞返件衫同條褲入嚟廚房著，好似驚死我睇唔到佢換衫咁，而我…就梗係專業咁望住鑊炒麪，如果為咗望佢啲麪燶咗實俾佢鬧死。




Q：「嘩，乜今日咁大陣仗呀？」
我：「係呀，心情好，放長假就煮好啲啦。」
Q：「你今日真係怪怪哋咁喎，嗱，幫我洗埋呢個Bra佢啦，頭先行街行到成身汗。」
喺我面前除裙都不特止，著完衫之後佢唔穿手喺入面拆咗個Bra出嚟掉咗去個籃度，我都懶得研究佢點喺瞬間入面完成呢啲高難度動作。
我：「無呀，一陣有聖誕禮物收咋嘛。」
Q：「你睇下你吖，又話對住我敬足成日禮會攰，你睇下你自己條褲點嘅樣先吖。」
我：「妳喺我隔籬換衫，叫我可以點…」
Q：「我都無怪你，唔使擔心喎，你無反應我重驚啦。」佢重要喺度奸笑。
我：「吓，有乜好驚？」
Q：「即係話我樣衰唔夠吸引啫。」




我：「唔會啦，妳係天下最索嘅女神，好未？」
Q：「賣口乖，算你啦，不枉我蝕底啲畀你一飽眼福…呀，你講起聖誕禮物，睇嚟我今年都…」
我：「咁妳喺學校都…」
一望到眼前嘅水仙花牌五香肉丁我就收咗口。
Q：「咁有嘅，頭先放學都有兩個男仔送嘢畀我，但係我平時屋企嗰份就…」
我：「今年得兩份咁少？」
其實我都唔知佢收開幾多，只係無諗過得咁少。
Q：「無呀，我都唔恨嘅，只不過而家收多幾份攞嚟賣都好吖…你都知學校好多人傳我有仔，啲男仔覺得無機就送畀第二個㗎啦。」
我：「咁妳又真係有仔吖嘛…」
Q：「唓，我從來都無認過…而且有仔就唔可以追我嘅咩？」嘩，右女神貪心得妳吖。




我：「咁…我嗰枝四色筆妳攞埋去囉。」
Q：「但係會唔會唔係太好，難得你抽中…」
我：「傻啦，我啲字又肉酸，溫書又唔鍾意寫字，我用咪盞嘥咗，妳好好發揮佢啦。」
Q：「不如放喺屋企我哋一齊用咪得囉，不過你字都唔寫多隻，結果又得返我用晒，嘻嘻。」
唔使解釋喇，我心入面剩係等緊老竇份禮物啫。
我：「好，開飯！」
今日餐單，五香肉丁炒公仔麪，蒸水餃，繼續蠔油西生菜同Zero，咁就飲完一枝，啲汽水已經無乜汽，希望佢唔好介意啦，始終一大枝平好多。
Q：「嘩，真係有鑊氣㗎喎，唔差得過大排檔！」
睇嚟佢行街消耗咗好多卡路里，一捧到去佢面前就不顧儀態大啖大啖咁塞入個口度。
顧儀態就唔會喺屋企長期飛釘啦…
「叮噹！叮噹！」